عاجل.. أول تعليق من بيتر ميمي على الانتقادات الموجهة لـ "الحشاشين"

علق المخرج بيتر ميمي على الانتقادات الموجهة لمسليل “الحشاشين”، عبر حسابه بموقع التواصل الاجتماعي "فيسبوك" قائلا: “طيب كل سنة وانتم طيبين.. مع انى مكنتش حابب اتكلم علشان دول كلهم ٤ حلقات!”.

وأضاف: “مبدأيا المسلسل من وحي التاريخ وده مكتوب نصا فى التترات يعنى مش وثيقة تاريخية لكنه دراما تاريخية.. هو تارنتينو لما قتل هتلر فى السينما كان حقيقة؟ أو نابليون فى فيلم ريدلى سكوت الاخير هل ده نابليون اللى فى كتب التاريخ؟ ديه دراما تاريخية.. حاولنا نعمل خيال تصويرى لفترة من الفترات لكن فى شكل درامي.. لكن رجعنا فى الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه افلام أو مسلسلات عالمية”.

وتابع: “هل ده حسن الصباح؟ مفيش كتاب اتفق على حسن الصباح لان المغول حرقوا القلعة وكتبه وافكاره والمجهود اجتهاد… ماركو بولو أو فلادمير بارتول أو برنارد لويس أو فرهاد دفترى… وكتير جدا حسن الصباح كان بيعمل معجزات؟ لا طبعا!!! وده تباعًا مع الحلقات هيتفهم”.

وأردف: “الحشاشين مسلسل تاريخي بالعامية المصرية.. الاحداث بيت اتراك وفرس.. لما عملوه الاتراك اتكلموا تركي ولما عملوه الامريكان بيتكلموا انجليزى.. احنا عاملينه فى مصر والترجمة موجودة فى كل بلد.. المسلسل بيتعرض فى روسيا وامريكا واكتر من بلد كل بلد بلغتها.. هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الامريكية”.

ليه حسن الصباح؟ حسن الصباح شخصية فذة وغريبة ومستفذة انك تعرف عنها.. مش لازم يكون رمز للخير علشان يتعمله مسلسل.. هتلر وراسبوتين كانوا فى منتهى الشر لكنهم شخصيات فذة غيرت العالم.. أو على مستوانا المصرى خط الصعيد أو سفاح اسكندرية".

واستكمل:  "حاجات صغيرة..
- ام الخليفة رصد كانت نوبية الاصل
- اسكندرية مدينة فى مصر.. لان فى مدن كتير باسم اسكندرية حوالين العالم.. لزم التوضيح للترجمة لان فيه غير مصريين بيتفرجوا على المسلسل
- مجاعة القاهرة الفاطمية مثبوتة تاريخيا لكن تعددت اشكالها حسب المصادر وهى على فكرة كانت قبل وصول حسن بفترة مش بعيدة بس ديه دراما (من وحي التاريخ)
- ماتسمى بمعجزات حسن الصباح مقصود تتصور بالشكل ده وده هيبان تباعا وخصوصا مشهد الراوي حلقة ٨
- عم ملك شاه اتقتل بوتر القوس لان ده كان عرف وتقليد

مين الست اللى بتظهر لحسن الصباح؟ ده فى حلقة ٣٠ بقى لو ربنا ادانا عمر..

واختتم: "كل سنة وانتم طيبين وسعيد ان المسلسل خلاكم تقروا وتسألوا.. وشوية شوية هتفهموا المسلسل.. صحصحوا معانا كده يا شباب خلونا نعمل شكل جديد..   وتبقى بداية ومع الوقت يتعمل افضل واكبر واحسن من اللى احنا عاملينه.. ومع الوقت ننافس …#سنغزو_العالم".