تأنيب ضمير.. هاجر الشرنوبي تتعرض للسرقة من خادمتها

أعلنت الفنانة هاجر الشرنوبي، عبر حسابها الرسمي بـ فيس بوك، تعرضها لعملية سرقة من الخادمة التي تعمل عندها في المنزل.

وقالت: “أنا عاوزة قرار يريح قلبي وضميري في نفس الوقت.. أنا في اختبار صعب وعماله أسأل كل اللي حواليه أعمل إيه؟ الست اللي بتساعدني في البيت سرقتني، شكيت فيها اه بس مكنتش متأكده ومحبتش أظلم ولا أبلغ.. قولت أنا مش هجيبها البيت تاني وخلاص، كلمتني كذا مرة مردتش... المهم سابتلي ڤويس وصوتها كان تقيل صوت حد عنده جلطة.. أنا اتجننت أني ظلمتها ووصلت للحالة دي، كلمتها مالك يابنتي في أيه.. قالتلي ابني كان مأجر موتوسيكل واتسرق منه والراجل شراني وعاوز فلوس عاوز كام كذا، المهم كلمت الناس اللي كانت بتساعدهم كلهم في البيت ولمينا فلوس أقسم بالله مش معايا أساسا وروحتلها البيت، بس حسيت أنها تمام وبكامل صحتها هي بس متقلة في صوتها مش أكتر”.

واستكملت هاجر: المهم قلت دي حاجة لربنا وخلاص وحسبي الله ونعم الوكيل فيها لو كل ده فيلم، وسافرت بعدها بعشر أيام، لقيت ظابط بيكلمني وبيقولي أن الست دي ظبطوها وهي بتبيع فرده الحلق بتاعتي ومع الضغط عليها اعترفت أنها سرقتني وأنها كانت بتمثل عليا أنها اتجلطت ما بين سين وجيم في التليفون، قلت للظابط بس أنا متنازله ومش هينفع تتسجن عشان هي عندها أولاد صغيرين العفو عند المقدرة  وبنتها الصغيرة كانت بتيجي معاها وأنا كنت متعلقة بيها عاطفيًا جدًا.

وأوضحت هاجر: هي زقردة كده عندها 9 سنين بس بحبها أوي كلمتني وقالتلي والنبي ياطنط أنا مش هعرف أعيش من غير ماما، ماما مسكوها وهي بتبيع الحلق بتاعك وفجأة الخط قطع.. أنا مش عارفة البنت الصغيرة عارفة حقيقة والدتها ولا لأ؟ ودي بالنسبالي بجد قصة تانية أسوأ من كل الموضوع ده، المهم هرجع تاني للموضوع.. اتضح إني لازم بنفسي أروح القسم اتنازل، ومن حظها الوحش أني كنت مسافرة واتأخرت عليها ولما رجعت من السفر روحت في اليوم الخامس اللي اتجددلها في الحبس.. واتفاجأت وأنا في النيابة أن خلاص ميعاد جلستها بعد بكرة وللحظ السيء أني مسافرة برضه بس قررت أعمل توكيل لمحامي.

واختتمت هاجر الشرنوبي حديثها، قائلة: كلمت الناس اللي كانوا جيبينهالي والناس دي كلمت كل الناس اللي كانت بتروحلهم في الكومباوند اكتشفنا كمية سرقة ونقل كلام لا تعد ولا تحصي، أنا ليه بحكي كل ده ؟ علشان الحته اللي جايه دي بس، في حاجة كده رنت في ودني أني أكلم دار الإفتاء كلمتهم قالولي أني لو روحت وقولت أنها مسرقتنيش تبقي شهادة زور، ولو قولت أنها سرقتني بس أنا مسامحاها كده هيبقي تنازل عن شق مدني وهيبقي لسه في شق جنائي وهيتحكم عليها، إيه العمل؟ أتصرف أزاي أنا بجد صعبان عليا الأولاد الصغيرين أوي، وفي نفس الوقت أكيد مش هشهد زور اتصرف إزاي.. أنا عاوزه قرار يريح قلبي وضميري في نفس الوقت.

احدث أعمال هاجر الشرنوبي

ومن ناحية أخرى، تنتظر الفنانة هاجر الشرنوبي طرح أحدث أعمالها السينمائية، فيلم السرب، الذي تشارك فيه رفقة مجموعة من كِبار نجوم الفن، أبرزهم الفنان أحمد السقا، آسر ياسين، كريم فهمي، شريف منير، هند صبري، أحمد حاتم، منذر رياحنة، وآخرون، والفيلم من تأليف عمر عبد الحليم وإخراج أحمد نادر جلال.

آخر أعمال هاجر الشرنوبي

يذكر أن آخر أعمال هاجر الشرنوبي هو مسلسل "الضاحك الباكي" الذي تم الانتهاء من عرضه منذ فترة، وكان يشارك به عدد من النجوم، منهم: عمرو عبد الجليل، رزان مغربي، محمد سليمان، فردوس عبد الحميد، مصطفي شوقي، هاجر الشرنوبي، محمد صلاح آدم، أحمد علي، غيرهم من الفنانين والفنانات، وشاركت هاجر في مسلسل "الاختيار" في موسمه الثالث، والذي عرض في السباق الرمضاني الماضي لعام 2022،  وتدور أحداثه تدور الأحداث حول محاولات المخابرات المصرية التصدي للإرهاب متمثلًا في تنظيم داعش، حيث يقوم العاملون بالمخابرات من ضباط وخبراء اتصال وعملاء سريين، كلٌ بدوره في عمليات تهدف إلى حماية الوطن والقضاء على الإرهاب.