حمزة نمرة يستحوذ على صدارة تريند "يوتيوب" بـ 3 أغانٍ من ألبوم "رايق"
تصدر المطرب حمزة نمرة تريند يوتيوب الموسيقي بـ 3 أغانٍ جديدة من ألبومه الغنائي «رايق»، حيث جاءت أغنية «مش سليم» في المركز الأول، وتليها أغنية «أنا الطيب» فى المركز الثاني، وتراجعت أغنية «رياح الحياة» للمركز الرابع، وذلك بعد تصدرها قائمة الأغاني الأكثر استماعًا وتداولًا في مصر والوطن العربي عبر موقع الفيديوهات الشهير «يوتيوب»، ومنصات الموسيقي المختلفة.
أغنية مش سليم
تصدرت أغنية «مش سليم»، للمطرب حمزة نمرة سابع أغنيات ألبومه الغنائي الجديد «رايق»، التريند رقم 1 على يوتيوب الموسيقي، وحققت مشاهدات عالية ووصلت إلى مليون خلال يومين فقط من طرحها عبر موقع الفيديوهات الشهير «يوتيوب»، وجاءت الأغنية من كلمات محمود فاروق، ألحان أندريه مينا وحمزة نمرة، توزيع وميكساج أندريه مينا، جيتار وعود حمزة نمرة، تنفيذ وتريات أحمد عاطف.
وتقول بعض كلمات أغنية «مش سليم»:-
جزء كان تعبان وخف
وجزء لسه للأسف
كان زمان عفريت دفنته
بعد فترة رجعلي ألف
مش يا ماضي لسه سايبك
إيه بقى تاني اللي جايبك
كنت ماشي خلاص كويس
مرّة واحدة شريطي سف
تاني تاني
ارجع يا ماضي تاني
يلا فكرني إن انا لسه واقف مكاني
عادي عادي
أصلي اتعودت عادي
هات بقى أخرك
ما هو يا انا يا انت الليلادي
تاني تاني
ارجع يا ماضي تاني
يلا فكرني إن انا لسه واقف مكاني
عادي عادي
أصلي اتعودت عادي
هات بقى أخرك
ماهو يا انا يا انت الليلادي
أغنية أنا الطيب
تصدرت أغنية «أنا الطيب» للمطرب حمزة نمرة التريند رقم 2 عبر موقع الفيديوهات الشهير «يوتيوب»، وجاءت أغنية «أنا الطيب» من كلمات محمود فاروق، ألحان حمزة نمرة، توزيع وميكساج عمرو الخضري، جيتار مصطفي نصر، أكورديون وربابة محمود شاهي، ناي محمد عاطف.
وتقول بعض كلمات أغنية «أنا الطيب»:-
أنا الطيب وعامل فيها مش طيب
علشان الناس بقت بتدوس على الطيب
ومين كان حس بينا يا دمعي يا قريب
بمثل اني مش طيب علشان انتو
ديابة ولازم انتش لقمتي منكم
وليه يا زمن بقى الطيب بتعيب
عامل قاسي وجواية مفيش قسوة
مليش غير قسوتي عزوة
بتدو الحق للأقوى
وبتيجو تملي على الطيب
وشراني لكن من جوة وحداني
وياما صرخت أه ياني
ودوستوا على الجراح تاني
مشفتش حد بطيب
عامل جامد لكني ورا الحيطان عيل
ولما الدنيا بتليل بشيل وشي اللي بمثل
وأروح أنام ع الجانب الطيب
يا ناس يا ناس واقف مبلم
يارب حوش يارب سلم
دانا اتجرحت جرح علم
أغنية رياح الحياة
حقق المطرب حمزة نمرة نجاحًا كبيرًا برابع أغنيات الألبوم «رياح الحياة»، وتصدرت الأغنية التريند رقم 1 على يوتيوب الموسيقي وقت نزولها، وحاليًا تحتل الأغنية قائمة الأغاني الأكثر استماعًا وتداولًا في مصر والوطن العربي، ووصلت لـ 6 مليون ونصف مشاهدة عبر موقع الفيديوهات الشهير «يوتيوب»، وهى من كلمات محمود فاروق، ألحان حمزة نمرة، توزيع وميكساج كريم عبد الوهاب، جيتار مصطفي أصلان، باص جيتار أحمد رجب، تنفيذ وتريات أحمد عاطف.
وتقول بعض كلمات أغنية «رياح الحياة»:-
تهبي يا رياح الحياة دايما بما لا اشتهيه
واللي السنين مقدماه غير اللي قولت نفسي فيه
يلاقي قلبي فين دواه
واللي اذاه اقرب ما ليه دة جرح بيعلم
وصعب تسكن الالام واخرج من اللي فات سليم
وصعب لما اروح انام مفضلش اراجع القديم
طلع مكلف العلام
وخدت درس في الصميم ولسة بتعلم
ركز يا قلبي في اللي جاي والف شكر للي باع
ما صانش حتى بوق شاي سلام يا 300 وداع
واللي لقانا مايساعوش ف خانة الوداع تساع
مشاعرنا مش لعبة
ألبوم رايق
يذكر أن المطرب حمزة نمرة يقدم موسيقي مختلفة فى ألبوم «رايق»، وتتنوع إيقاعات الأغاني بين الموسيقى الشرقية والفيوجن والشعبي مع الفلامنكو والأفروبيت، ويتضمن الألبوم 13 أغنية يتم إطلاقها بشكل فردى بواقع أغنية جديدة في الأربعاء من كل أسبوع عبر المنصات الإلكترونية المختلفة على مدار موسم الصيف الحالي، وسيتم إصدار الأغاني بشكل كليبات مصورة أسبوعيًا، حيث يختتم أغنيات الألبوم في 6 سبتمبر القادم بأغنيتي «يا سفينة»، و«رجعنا لوجع القلب».
