أغنية "أنا الطيب" لـ حمزة نمرة تحقق أكثر من نصف مليون مشاهدة

حقق المطرب حمزة نمرة نجاحًا كبيرًا بأغنيته الجديدة «أنا الطيب»، واحتلت الأغنية المركز الثاني في قائمة الأغاني الأكثر استماعًا وتداولًا في مصر والوطن العربي عبر موقع الفيديوهات الشهير «يوتيوب».

وبتربع نمرة علي عرش تريند يوتيوب، بثلاث أغنيات جديدة من ألبومه الغنائي «رايق»، حيث جاءت أغنية «رياح الحياة» في المركز الأول، وتليها أغنية «أنا الطيب» فى المركز الثاني، وحصلت أغنية «لعله خير» علي المركز الثالث فى قائمة الأغاني الأكثر استماعًا وتداولًا في مصر والوطن العربي.

وتقترب أغنية «أنا الطيب» من 700 ألف مشاهدة، وتكون أول أغنية في الألبوم التي يغلب عليها الطابع الشعبي في اللحن والتوزيع، وهي من كلمات محمود فاروق، ألحان حمزة نمرة، توزيع وميكساج عمرو الخضري، جيتار مصطفي نصر، أكورديون وربابة محمود شاهي، ناي محمد عاطف.

وتقول كلمات أغنية «أنا الطيب»:-

أنا الطيب وعامل فيها مش طيب
علشان الناس بقت بتدوس على الطيب
ومين كان حس بينا يا دمعي يا قريب
بمثل اني مش طيب علشان انتو
ديابة ولازم انتش لقمتي منكم
وليه يا زمن بقى الطيب بتعيب
عامل قاسي وجواية مفيش قسوة
مليش غير قسوتي عزوة
بتدو الحق للأقوى
وبتيجو تملي على الطيب
وشراني لكن من جوة وحداني
وياما صرخت أه ياني
ودوستوا على الجراح تاني
مشفتش حد بطيب
عامل جامد لكني ورا الحيطان عيل
ولما الدنيا بتليل بشيل وشي اللي بمثل
وأروح أنام ع الجانب الطيب
يا ناس يا ناس واقف مبلم
يارب حوش يارب سلم
دانا اتجرحت جرح علم
ماشي يا دنيا
ما جبش حقي غير دراعي
يا ريتني حاوي دول أفاعي
ما فيش لطيبتي أي داعي
لا لا لا لا
أنا البعبع وشايل بين ضلوعي ملاك
ولو نزلت دموعي هلاك
يا قاسي القلب ايه قساك
وخلاط تيجي ع الطيب
أنا المأذي ومش عايز أكون مؤذي
لكن لو حتإذي هأذي
وده مش بكيفي ده حظي
ونفسي في يوم أعود طيب
ومش خواف ولو قلتكوا اني بخاف
أخاف لتقرقشوني حاف
وياما منكو قلبي شاف
عالم وحوش مبترحموش طيب
يا ناس يا ناس واقف مبلم
يارب حوش يارب سلم
دانا اتجرحت جرح علم
ماشي يا دنيا
ما جابش حقي غير دراعي
ياريتني حاوي دول أفاعي
مفيش لطيبتي أي داعي
لا لا لا لا

ألبوم رايق

يقدم المطرب حمزة نمرة موسيقي مختلفة فى ألبوم «رايق»، وتتنوع إيقاعات الأغاني بين الموسيقى الشرقية والفيوجن والشعبي مع الفلامنكو والأفروبيت، ويتضمن الألبوم 13 أغنية يتم إطلاقها بشكل فردى بواقع أغنية جديدة في الأربعاء من كل أسبوع عبر المنصات الإلكترونية المختلفة على مدار موسم الصيف الحالي، وسيتم إصدار الأغاني بشكل كليبات مصورة أسبوعيًا، حيث يختتم أغنيات الألبوم في 6 سبتمبر القادم بأغنيتي «يا سفينة»، و«رجعنا لوجع القلب».