حمدى بتشان: "الأساتوك" كنت رافض أغنيها فى البداية ونجاحها خلانى لفيت الدنيا
حمدى بتشان: "الأساتوك" لففتنى الدنيا كلها.. وأى شغل في الدنيا جواه حب بيصنع معجزات
حل صناع أغنية "سطلانة" ضيوفًا على برنامج صاحبة السعادة الذي تقدمه الفنانة والاعلامية إسعاد يونس، المذاع عبر قناة dmc، كشفوا كواليس الأغنية وفكرتها، وذلك بعد أن أثارت جدلًا عبر مواقع التواصل الاجتماعي بشكل كبير.
كواليس حياة حمدى بتشان الفنية
وروى حمدى بتشان كواليس بدايته خاصة مع نجاح أغنية "الأساتوك" قائلًا: "في البداية اتفق معايا منتج إننا نعمل شريط وأنا كنت محضر 8 أغانى أصلا، وقال هنسجلهم وكده، وأنا كنت سافرت تونس في حفل ورجعت لقيت مطرب تانى غنى الشريط، من بعد الموضوع ده عملت شريط الأساتوك، وأنا كنت رافض أغنيها في الأول لأنى بغنى مواويل والأغنية دى المهندس عمر فودة عاوزنى أتخانق مش أغنى؛ لأنه واحد عاكس واحدة والمنتج قال لى لو غنتها هاديك باقى فلوسك، فاضطريت أغنيها، وسبحان الله الأغنية دى لففتنى الدنيا كلها".
حمدى بتشان يروي كواليس مشاركته في "سطلانة"
وأضاف حمدى بتشان: "لما قالولى على الأغنية ما اتأخرتش لحظة، والعمل جماعى 4 مطربين في غنوة في فيلم وكل واحد فينا اجتهد وعمل اللى عليه، وربنا كلل مجهودنا، وإن اللاعب طاهر محمد طاهر يحطها في الكاسيت ويشغلها وكل الناس تغنيها، وده لأن أى شغل في الدنيا جواه حب بيصنع معجزات وعمرنا ما بنفكر إن أي أغنية هتفرقع وتكسر الدنيا".
صناع “سطلانة”: هنغني في فرح طاهر محمد طاهر ببلاش
وخلال اللقاء قال محمود الليثي: إحنا الأربعة هنغني لطاهر محمد طاهر ببلاش علشان وشه حلو علينا، والأهلي كسب الوداد، النادي الأهلي الكبير بتاعنا، الماتش خلص، اللاعيبة خرجت من الماتش وراح أوضة اللبس وشغلوا سطلانة بالحظ، إحنا نمنا يوم الماتش، صحينا لقينا الأغنية تريند، وإحنا كسرنا المريخ.
أغنية "سطلانة"
ويذكر ان أغنية سطلانة قد تصدرت محركات البحث خلال الفترة الماضية، بعدما تصدرت احتفالات الأهلي بعد الفوز بدوري أبطال إفريقيا وظهور اللاعبين وهم يرددونها عقب الفوز أمام الوداد، كما وصلت مشاهدات الأغنية إلى أكثر من 7 ملايين مشاهدة على يوتيوب، وهي من كلمات مصطفى حسن، وتوزيع أماديو، وألحان كريم عاشور، وتعد سطلانة الأغنية الدعائية لفيلم بعد الشر، الذي طرح في موسم أفلام عيد الفطر 2023، وهو من بطولة الفنان علي ربيع، وعدد من الفنانين، أبرزهم الفنانة ميرنا نور الدين، ملك قورة، رنا رئيس، أوس أوس، عمرو عبد الجليل، بيومي فؤاد، شيرين، هالة خليل، سليمان عيد، وآخرين، وهو من إخراج أحمد عبد الوهاب.
