واعظة بالأوقاف تحذر من أخطاء جسيمة يرتكبها الوالدين وتفسد الأبناء
كشفت الدكتورة وفاء عبد السلام، الواعظة بوزارة الأوقاف، عن أخطاء جسيمة يقع فيها الوالدين أثناء تربية أبنائهم، مؤكدة أن تلك الأخطاء تمثل إشكالية كبيرة فى تربية الأبناء، مما يتسبب فى إفساد التربية.
أخطاء تفسد التربية
وقالت الدكتورة وفاء عبد السلام، خلال لقائها ببرنامج "البيت"، المذاع عبر قناة "الناس"، اليوم الثلاثاء: "تفضل الأم تعلم أولادها إنهم يكونوا حنينين على بعض، وتيجى فى لحظة وقدام الأولاد تقول لزوجها من ساعة لما أختك زارتنا وحياتنا نكد، الطفل هنا شاف الكلام مهما تعلمى فيه لما يكبر هيتعامل مع أخته بنفس طريقتك مع زوجك".
الوالدين قدوة
وأضافت الواعظة بوزارة الأوقاف: "تلاقى الأم والأب عمالين يعلموا أولادهم عدم الكذب ولازم يكونوا صادقين دائما، تبص تلاقى التليفون رن، تلاقى أحدهما يقول قول مش موجود، أنتم كده علمتوه الكذب وأنتم لا تشعرون، لأن الأولاد بيأخذوا القدوة من والديهم، وهو ده اللى هيتعاملوا به لما يكبروا".
الآداب المحمدية
وتابعت: "لازم نخلى بالنا من الأمور دى ونعلم أولادنا الآداب المحمدية، دى اللى هتنجيهم من البلاء والابتلاء، سيدنا النبي بعث لإتمام مكارم الأخلاق، لازم نخلى الأولاد يبقى تعاملاتهم مع ربنا ويعرفوا إن ربهم شايفهم".
