مي سليم: نزلت اشتغلت في نفس يوم الحادثة وكنت منهارة لكن الظروف قاسية

تحدثت الفنانة مي سليم،في منشور لها عبر حسابها الشخصي بموقع فيسبوك، عن معاناة نجوم الفن من أجل إسعاد المُشاهد، دون الأخذ في الاعتبار الظروف السيئة التي قد يمرون بها، مؤكدة أنها على الرغم من تعرضها لحادث خلال الأيام الماضية وعدم قدرتها على التحرك وانهيارها الشديد، إلا أنها كانت مضطرة للذهاب إلى التصوير في نفس يوم الحادث.

وكتبت مي سليم: الشغل ساعات بيكون قاسي مهما كانت ظروفك، لازم تنزل تشتغل.. أنا نزلت في نفس يوم الحادثة، وأنا مش قادرة اتحرك وكل جسمي كدمات، ومش قادرة أقول كلمة ومنهارة مش قادرة حتى أدوس على رجلي، كان مطلوب مني أروح التصوير، وأنا مفيش أعصاب أصلا في نفس اليوم، مفيش حاجة سهلة الكل بيشوف من برة.

دانا حمدان: مي سليم ربنا لطف بيها

ومن ناحية اخري، كشفت الفنانة دانا حمدان، تفاصيل تعرض شقيقتها مي سليم لحادث تصادم على الطريق الدائري باتجاه المعادي، قائله إنه حادث تصادم وقع بين 4 سيارات من بينها سيارة شقيقتها مي سليم، موضحة: سيارة مي تحطمت.. ربنا لطف بيها، وهي كويسة ومفيش إصابات أو أذى، وحصلت الحادثة أثناء ذهابها إلى تصويرها أحد أعمالها الفنية.

مي سليم: المواقف بتبين معادن الناس

كما حرصت مي سليم، عبر حسابها الشخصي بموقع تبادل الصور والفيديوهات انستجرام، على توجيه رسالة شكر لأصدقائها وجمهورها الذين حرصوا على الاطمئنان عليها بعدما تعرضت لحادث سير مروع خلال الأيام الماضية، كتبت: حقيقي المواقف الصعبة بتبين معادن الناس ومحبتهم وأنا ربنا أنعم عليّ بأجدع إخوات وجمهور، عاجزة عن الشكر لكل من سأل عليّ بمكالمة أو رسالة.

آخر أعمال مي سليم

ويذكر ان آخر أعمال مي سليم هي أغنية «بنتي» وهي من كلمات محمود عبد الله لحن محمدي، توزيع أحمد أمين ومن إنتاج آلاء لاشين، وروجت مي لها قبل طرحها في وقت سابق وشوقت جمهورها لـ الأغنية، ظهرت مي وهي ترتدي فستانًا منفوش باللون البيج واعتمدت مكياج يبرز جمالها وتسريحة شعر مناسبة لجلسة التصوير التي خضعت لها.

كلمات أغنية بنتي

عدت الأيام يا بنتي والليلة دي الكل شافك
وسط فرحة كبيرة وإنت قاعدة لابسة ثوب زفافك
أيوة رايحة لدنيا ثانية لسه فيها هتبتدي
بس قلبي هيبقى عندك مهما عني هتبعدي
كنت وأنا بلعب معاكي بدعي وفي حضنك بضم
إني أشوفك يوم عروسة زي حلم أي أُم
وأدي أحلامي ودعايا شوفتهم بعينيا آهم
فهّميني كبرتي إمتى لأ وقلبك ذاب وحب
يا اللي لسه ما جاش في عمري أغلى منك أو أحَب
ربنا يهنيكي دايمًا باللي تتمنيه يا رب
نمسك الخشب النهار ده هو فيه حد في جمالك
لأ وبكرة الفرحة تكمل وبإيديّ أشيل عيالك
بالسلامة وبدعي ليكي طول حياتك تكسبي
عايزة أوصي كمان حبيبك شيلها في عينيك والنبي
كنت وأنا بلعب معاكي بدعي وفي حضنك بضم
إني أشوفك يوم عروسة زي حلم أي أُم
وأدي أحلامي ودعايا شوفتهم بعينيا آهم
فهّميني كبرتي إمتى لأ وقلبك ذاب وحب
يا اللي لسه ما جاش في عمري أغلى منك أو أحَب
ربنا يهنيكي دايمًا باللي تتمنيه يا رب