غنوة محمود لـ الفجر الفني: 'محمد سعد بيساعد كل طاقم العمل.. وهذا سبب تحمسي للمسلسل'
غنوة محمود هي فنانة من أصول لبنانية مقيمة في مصر منذ 14 عام، تألقت غنوة في الموسم الرمضاني بعملين دراميان أحدهما مصري وهو مسلسل الحاج إكسلانس بجانب محمد سعد، والثاني لبناني وهو مسلسل وأخيرًا بجانب نادين نسيب نجيم وقصي الخولي
ما العوامل التي جذبتك للدور؟
الدور ده مميز لأنه فنانة لبنانية وبتروح تحقق حلمها في مصر وبتحصل مشاكل في الإقامة وتبدأ هناك المشوار بتاعها والمطبات اللي بتواجهها والمشاكل ومين هيقف جنبها.
فالدور بالنسبالي مميز وحلو خاصة مع الفنان الكبير محمد سعد وكان بقالي فترة بشتغل مع شركة mgr وكانت تجربة حلوة وكان مسلسل كوميدي بالنسبالي أول مسلسل كوميدي ليا بردو كانت تجربة بالنسبالي حلوة والحمد لله كانت الأضواء حلوة على دوري وعلى المسلسل فكانت بالنسبالي تجربة حلوة إني أعملها في رمضان
حديثنا عن احساسك لإداءك أول بطولة ليكي في عمل مصري؟
أنا من 2014 موجودة في مصر ودايما بيجيلي أدوار مصرية بداية من تماسيح النيل وشارع عبد العزيز وكلبش وحاجات كتير عملتها في مصر ودايما أدواري بتجيبلي أدوار تانية ومسلسلات بتجيب مسلسلات تانية وأنا قعدت في مصر فترة طويلة كده عشان أتقن اللهجة وأتعلمها أكتر لأن معظم أدواري كانت باللهجة المصرية
حديثنا عن كواليس العمل كيف كانت وتعاملك مع طاقم العمل؟
الكواليس حلوة أوي طبعًا خاصة أن الأستاذ محمد سعد بيتابع التفاصيل وبيساعدنا وبيقف جنبنا على أي ملاحظة ومبيخليش أي حاجة تعدي عادي بالعكس كان بيدقق في كل التفاصيل وكتير دقيق في شغله ودي حاجة بتخلينا مبسوطين إنه هو مش مسئول بس عن شغله لا كل شخص كان بيقف جنبه وبيساعده خاصة ساعدني في حاجات كتير في الدور فبالنسبالي كنت فرحانة أوي وكان معايا جميل أوي ومتواضع ومبيبخلش عليا في أي معلومة في أي نصيحة في أداء فبالنسبالي كانت حاجة حلوة أوي، وبالنسبالي الكواليس كانت لذيذة وطول الوقت كان فيها ضحك عشان المسلسل لذيذ وكوميدي فكنا طول الوقت بنضحك على أي مشهد بيحصل والكواليس كانت خفيفة ولذيذة وكله كان زي العيلة بيتعامل وكنا مبسوطين والمخرج إبرام بردو جميل أوي ولذيذ ومريح بيسيب الممثل يدي أكبر طاقة عنده ويديله مساحته كل حاجة كانت حلوة حتى طاقم العمل كله جميل ولذيذ وخفيف وكله بيحب بعضه وأنا محستش بالمسلسل وكان سريع وسهل وأنبسطت فيه أوي
ما هو أصعب مشهد واجهتي صعوبة فيه؟
أصعب مشهد بالنسبالي اللي ببقى بعمله في ساعتها كل مشهد بعمله ببقى قلقانة منه لازم أطلع أحسن ماعندي ولازم توصل مظبوط وأنا بفكر بالزيادة وده بالنسبالي دايما كل مشهد هو المشهد الأصعب فمعنديش مشهد صعب ومشهد سهل كلهم عندي زي بعض مفيش حاجة المفروض تعدي اللي هو ده مشهد سهل فأقوله أي كلام مينفعش
من وجهة نظرك هل من الصح أن البنت تتزوج من شخص أقل منها في المستوى سواء اجتماعي تعليمي ثقافي؟
هو لازم يبقى قريب منها عشان بس يبقوا فكريًا على الأقل نفس المستوى فكريًا ثقافيًا يبقوا قادرين ينسجموا مينفعش أنه يكون هو في حاجة وهي في حاجة تانية فمفيش إنسجام ومفيش طريقة تفاهم فلازم يبقى على الأقل في حاجات مشتركة حتى لو ضحت في حاجة يبقى حاجة تانية قريبة منها بالنهاية كل ده هي بتعرف تختار الشخص اللي بتحس أنه مكملها
في رأيك المستوى الاجتماعي والتعليمي عليهما عامل في العلاقة بين الشخصين ويجعل بينهما تفاهم أم لا؟
لازم يبقوا شوية قريبين في المستوى ويبقوا نفس الاهداف ونفس الافكار ونفس طريقة التفكير عشان يعرفوا يكملوا مع بعض
ماهو رايك في نوعية شخصيات الرجال مثل حسن الذي يستغل الموقف ويكون ما داخله عكس الذي يظهره للناس؟
مبقاش في حد غبي ومبقاش في واحدة غبية والواحدة بتحس وبتعرف ومش بسرعة بتاخد قرارات ولازم يبقى في وقت مابين الاتنين يتعرفوا على بعض عشان يستكشفوا بعض مفيش حد هيبقى غبي وكله بيقدر يعرف التاني من أسلوبه وطريقته ويكون مدي وقت للتعارف عشان يستكشفوا بعض وربنا بيدي للاشخاص ناس شبه بعض ولو هي كويسة ونضيفة نلاقي ربنا بيكرمها بإنسان نضيف شبهها ولو مثلا حد مش كويس هي بتحس علطول وبتعرف ومعظم الوقت بتحس
كيف تري شخصية السيدات مثل ساهيل في الحاج إكسلانس؟
كانت بريئة زيادة عن اللزوم وفاكرة الناس كلها زيها وطبيعية وبريئة ومكنش عندها طريقة إنه ا تخلي بالها وطريقتها عفوية وفاكرة الناس زيها وعمرها مافكرت ان ممكن حد يستغلها وكانت صدمات بالنسبالها وفي حياتي عندي اني بصفي النية وبشوف اللي ادامي إنه كويس بس ببقى اكتر حريصة شوية اني اخلي بالي مش بتقرب كتير من الناس ودايما في حدود وبحاول كل حاجة تبقى قانوني وكل حاجة تبقى مظبوطة امشي عليها مش ان انا استسهل الحاجات وشخصيتي شوية بتختلف اني انا شوية عندي الامور باخدها بعقل اكتر مش بتلقائية
ما الرسالة التي كنتي تودي توصليها للجمهور من خلال دور ساهيل؟
من خلال شخصية ساهيل حلو إنه البنت يبقى عندها طموح ومثابرة وتبقى قوية وشخصيتها قوية وحلوة لذيذة وكيوت وفي نفس يبقى في حدود بالحاجات مثلا مسئولة عن قراراتها وتبقى شوية تاخد حذرها من الحاجات اللي بتعملها من افكارها من طريقتها متبقاش متبقاش متهورة
بماذا تنصحين السيدات مثل شخصية ساهيل حتى لا يقعوا فريسة في يد شخص استغلالي؟
بنصح اي بنت بإنه ا تخلي بالها في المواضيع دي وتدي وقت اكتر لما تتعرف على الشخص عشان لا تظلم ولا تتظلم ويبقى خدت وقتها وبكفاية يعني
حديثنا عن تعاونك مع نادين نسيب وقصي خولي في مسلسل واخيرا؟
التجربة مع نادين نسيب وقصي الخولي كانت أكتر من رائعة وهما شخصيات لذيذة وجميلة وموهوبين ومحترفين وشخصيات حلوة أو ي على الطبيعة أكتر من المسلسل وعلى طبيعتهم أحلى وأحلى من أحلى الشخصيات اللي قابلتها فالتعاون مع نجوم زيهم بالنسبالي اضافة وشخصيتهم الحقيقية احلى وهما من أجمل الشخصيات روحهم حلوة أو ي ونضيفة وطبيعيين وبيساعدوا الناس وأنا اتفاجئت بيهم على المستوى الشخصي.
