عماد الطيب: "الصعوبة في 'زياد' فصله عن دور 'كريم حمدي'.. وسعدت بردود أفعال المقربين والجمهور على الأداء" (خاص)

تحدث الفنان عماد الطيب في حوار خاص مع "الفجر الفني" عن الشيء الصعب الذي شغل تفكيره في دور "زياد" وشكل تحديا بالنسبة له، وعن ردود أفعال المقربين والجمهور على أدائه في تقديم دور "خيانة وطن" للمرة الثانية، وهو ما سترصده السطور التالية لكم بشيء من التفصيل.

عماد الطيب: الصعوبة في 'زياد'فصله عن دور كريم حمدي

أجاب عماد الطيب على سؤال "الفجر الفني" له بما هو أصعب ما واجهه في دور 'زياد'، فقال: "يمكن يكون ده من الصعوبات اللي واجهتني في تمثيل الدور ده إن أنا ازاي أفصله عن دور كريم حمدي حمزة في الاختيار 2 بس يعني الحمدلله لحد دلوقتي الفيد باك والمردود اللي جاي من الناس كويس سواء من الناس اللي بتشتغل معانا في المجال أو اصدقاء أو ناس غريبة في الشارع بتقابلني لحد دلوقتي الناس مختلطش عليها وعرفوا ووصل لهم اللي كنت بحاول اعمله في الدور هو إن أنا أفصل الدور ده عن الدور ده".

عماد الطيب: ردود أفعال المقربين والجمهور على الأداء أسعدتني

وتابع "الطيب" الحديث عن الدور بإضافة ردود أفعال المقربين منه والجمهور على أدائه الذي تخوف من تشابهه مع دور "كريم حمدي حمزة"، فقال: "
والله بالنسبة لموضوع إنه الناس إزاي كان ردود أفعالها كانت على الدور، عايز أقولك إن المقربين والجمهور وعامة الناس حتى اللي بقابلهم عادي والله أنا بقيت مبسوط جدا من ردود أفعالهم مش عشان أنا عملت الدور كويس وعجبهم، بالعكس عشان الناس بقى عندها وعي فني في إن هم يفهموا ويتذوقوا ويقدروا يميزوا اللي عامل الدور حلو بغض النظر عن شخصيته إيه وهو مين وكينونته عاملة إزاي وما بين الأداء الفني اللي هو عمله في المسلسل، فأنا الحمد لله أنا ردود الأفعال كلها كويسة وفرحتني جدا يعني كل الناس كانت شايفة إن زياد ده شخص حقيقي، وإن الدور معمول بطبيعية والحمدلله اجتهادي مرحش على الفاضي والناس حسته فدي حاجة بسطتني جدا".

عماد الطيب: تجربتي في "حرب" كانت مريحة جدا

وأضاف "الطيب" في حديثه رأيه في تجربته مع كرو مسلسل "حرب"، فقال: "تجربتي في المسلسل تجربة حلوة جدا ومريحة جدا، يعني بقالي سنين بشتغل، ده من أكتر التجارب المريحة ليا كممثل من أول ما اشتغلت لحد دلوقتي، مع إن المجهود اللي حاصل جوه الشغل مش سهل، يعني في مجهود بدني ومجهود في التصوير، وكنا بنصور في ظروف مش سهلة، كنت بصور صايم من الساعة 9 الصبح، فضلت بصور متواصل لحد بريك فطار، أخدنا بريك فطار وبعدين رجعت أصور تاني على طول ساعة، متوقفناش خالص لحد الساعة 4 الفجر، فهي الظروف قاسية، وفي وقت قاسي، وكان فيها مشاهد أكشن وتراب، وكان بالصدفة يوم القبض على "زياد" في الهنجر ده كان يوم ترابي جدا واحنا كنا بنصور في مشتل في وسط النيل، وكان تراب قوي جدا لكن يعني مكنتش متضايق خالص ولا تعبان من البروسس، لأن المنظومة كانت سهلة وسريعة ومريحة لأي فنان فده كانت تجربتي في المسلسل".

أبطال مسلسل "حرب"

الفنان أحمد السقا، الفنان محمد فراج، وأحمد سعيد عبدالغني، وسارة الشامي، محمود البزاوي، عبد الرحيم حسن، إيناس كامل، الشحات مبروك، مصطفى منصور، أحمد أبو زيد، ومحمد يوسف، إبراهيم كمال، عماد الطيب، شريف صبحي، ماجدة منير، أنجي المقدم، أحمد إمام، هشام حسين، محمود الباز، محمد أبو النجا، أحمد زنجرلي، أحمد داود، صبري عبد المنعم، ياسر علي ماهر، محمد العمروسي، حنان سليمان والعمل من تأليف هاني سرحان وإخراج أحمد نادر جلال.