عماد الطيب لـ الفجر الفني: "تجربتي في 'حرب' كانت مريحة جدا.. ولم تكن الملاكمة هي الأصعب في دور زياد"

كشف الفنان عماد الطيب في حوارٍ خاص لـ "الفجر الفني" عن رأيه في التجربة التي جمعته مع طاقم العمل وخاصة الفنان أحمد السقا وأصعب شيء واجهه في دور "زياد" الذي قدمه في مسلسل "حرب" في الماراثون الرمضاني السابق لهذا العام 2023، وفي السطور التالية نرصده لكم بشيء من التفصيل.

عماد الطيب: تجربتي في "حرب" كانت مريحة جدا

كشف "الطيب" في حديثه لنا عن رأيه في تجربته مع كرو مسلسل "حرب"، فقال: "تجربتي في المسلسل تجربة حلوة جدا ومريحة جدا، يعني بقالي سنين بشتغل، ده من أكتر التجارب المريحة ليا كممثل من أول ما اشتغلت لحد دلوقتي، مع إن المجهود اللي حاصل جوه الشغل مش سهل، يعني في مجهود بدني ومجهود في التصوير، وكنا بنصور في ظروف مش سهلة، كنت بصور صايم من الساعة 9 الصبح، فضلت بصور متواصل لحد بريك فطار، أخدنا بريك فطار وبعدين رجعت أصور تاني على طول ساعة، متوقفناش خالص لحد الساعة 4 الفجر، فهي الظروف قاسية، وفي وقت قاسي، وكان فيها مشاهد أكشن وتراب، وكان بالصدفة يوم القبض على "زياد" في الهنجر ده كان يوم ترابي جدا واحنا كنا بنصور في مشتل في وسط النيل، وكان تراب قوي جدا لكن يعني مكنتش متضايق خالص ولا تعبان من البروسس، لأن المنظومة كانت سهلة وسريعة ومريحة لأي فنان فده كانت تجربتي في المسلسل".

عماد الطيب: لم تكن مشكلتي الملاكمة ولكن اختلاط الأدوار على الجمهور

وتابع "الطيب" يحكي لنا عن أصعب شيء واجهه في دور "زياد" خلال تمثيله الدور وكان قلقا منه، فقال: "بالنسبالي مكنش في مشكلة أوي في الملاكمة، لأن أنا بلعب فنون قتالية من فترة كبيرة يعني من زمان من وأنا صغير كنت بلعب رياضات زي تايكوندو وكيج بوكسينغ ولما كبرت شوية بقيت بلعب أم أم أي "MMA" فأنا مكنش عندي مشكلة في الملاكمة".

وأضاف "الطيب" قائلا: "كان عندي مشكلة في أنه إزاي نطلع بأحسن شكل أنا وفراج في المشاهد بتاعتنا، فدي حاجة بالنسبالي الأصعب في دور زياد مكنش الرياضة، كان إن أنا بعمل شخصية زياد المهندس الخاين اللي بيبقى في الأول إنسان كويس وصديقه ظابط وبعدين بيبقى مع التكفيريين وبيخون صاحبه الظابط، والمشكلة إن أنا كنت لاعب دور زي ده في الاختيار 2 فكان كل همي إزاي اعمل الدور بعيد تماما عن الدور بتاع شخصية "كريم حمدي حمزة" في الاختيار 2 عشان هنا خاين وهنا خاين، حاولت بقدر الإمكان أن مفصلات الدور تبان مختلفة مابين هنا وما بين هنا عشان خاطر ميطلعش شبه بعضه، ده كان التحدي الكبير بالنسبالي اللي كان تاعبني وبيخليني أفكر في الدور طول الوقت بشكل متعمق بأنه ميبقاش نفس الشخصية ميبقاش نفس الأبعاد، ميبقاش نفس التفكير وميبقاش نفس التصرفات، يعني أحاول أخد الشخصية في حته مختلفة، فالناس ميختلطش عليها الأمر مابين الدور ده والدور ده".

أبطال مسلسل "حرب"

الفنان أحمد السقا، الفنان محمد فراج، وأحمد سعيد عبدالغني، وسارة الشامي، محمود البزاوي، عبد الرحيم حسن، إيناس كامل، الشحات مبروك، مصطفى منصور، أحمد أبو زيد، ومحمد يوسف، إبراهيم كمال، عماد الطيب، شريف صبحي، ماجدة منير، أنجي المقدم، أحمد إمام، هشام حسين، محمود الباز، محمد أبو النجا، أحمد زنجرلي، أحمد داود، صبري عبد المنعم، ياسر علي ماهر، محمد العمروسي، حنان سليمان والعمل من تأليف هاني سرحان وإخراج أحمد نادر جلال.