عماد الطيب لـ الفجر الفني: "سعدت بالعمل مع أحمد السقا في 'حرب' لأنه من نجومي المفضلين"

حاور "الفجر الفني" الفنان  عماد الطيب بعد نجاحه في دور "زياد" المهندس الذي خان صديقه ووطنه في أحداث مسلسل "حرب"، وقد نال أدائه إعجاب جمهوره ومتابعيه فأشادوا به، وفي السطور التالية نرصد لكم تفاصيل ترشيحه للدور ورد فعله عنه.

عماد الطيب: الترشيح كان بواسطة أساتذة كبار

أجاب "الطيب" على سؤال "الفجر الفني" له عن من الذي قام بترشيحه لدور "زياد"، فقال: "الترشيح لمسلسل "حرب" جه عن طريق أستاذ خيري سالم، المخرج المنفذ، وأستاذ إبراهيم فرج الكاستينج دايروكتور".

عماد الطيب: سعدت بالعمل مع أحمد السقا فهو من نجومي المفضلين

وتابع "الطيب" الحديث ترشيح عن الدور والعمل في مسلسل "حرب" واصفا لنا حالته الشعورية عند علمه بأن الفنان أحمد السقا هو بطل العمل، فقال: "ردة فعلي كنت مبسوط جدا إني بشتغل في عمل زي ده خصوصا مع نجم كبير زي أستاذ أحمد السقا؛ لأنه من نجومي المفضلين، واللي بحب تاريخه الفني من أول ما بدأ لحد دلوقتي؛ لأنه محافظ على نجوميته وكان دايما بيقدم حاجات مميزة جدا، ومن أوائل الناس اللي طورت الشغل بتاع الأكشن والحركة في مصر وفي الشرق الأوسط كمان مش مصر بس، فكنت مبسوط جدا إننا هنشتغل مع بعض".

عماد الطيب: تجربتي في "حرب" كانت مريحة جدا

وأضاف "الطيب" في حديثه رأيه في تجربته مع كرو مسلسل "حرب"، فقال: “تجربتي في المسلسل تجربة حلوة جدا ومريحة جدا، يعني بقالي سنين بشتغل، ده من أكتر التجارب المريحة ليا كممثل من أول ما اشتغلت لحد دلوقتي، مع إن المجهود اللي حاصل جوه الشغل مش سهل، يعني في مجهود بدني ومجهود في التصوير”.

وتابع “الطيب” قائلا: " وكنا بنصور في ظروف مش سهلة، كنت بصور صايم من الساعة 9 الصبح، فضلت بصور متواصل لحد بريك فطار، أخدنا بريك فطار وبعدين رجعت أصور تاني على طول ساعة، متوقفناش خالص لحد الساعة 4 الفجر، فهي الظروف قاسية، وفي وقت قاسي، وكان فيها مشاهد أكشن وتراب، وكان بالصدفة يوم القبض على "زياد" في الهنجر ده كان يوم ترابي جدا واحنا كنا بنصور في مشتل في وسط النيل، وكان تراب قوي جدا لكن يعني مكنتش متضايق خالص ولا تعبان من البروسس، لأن المنظومة كانت سهلة وسريعة ومريحة لأي فنان فده كانت تجربتي في المسلسل".

أبطال مسلسل "حرب"

الفنان أحمد السقا، الفنان محمد فراج، وأحمد سعيد عبدالغني، وسارة الشامي، محمود البزاوي، عبد الرحيم حسن، إيناس كامل، الشحات مبروك، مصطفى منصور، أحمد أبو زيد، ومحمد يوسف، إبراهيم كمال، عماد الطيب، شريف صبحي، ماجدة منير، أنجي المقدم، أحمد إمام، هشام حسين، محمود الباز، محمد أبو النجا، أحمد زنجرلي، أحمد داود، صبري عبد المنعم، ياسر علي ماهر، محمد العمروسي، حنان سليمان والعمل من تأليف هاني سرحان وإخراج أحمد نادر جلال.