ميس حمدان: أنا حبيبة ورومانسية جدًا.. وشقيقتها مي سليم تكشف عن هذا السر

كشفت الفنانة ميس حمدان، بعض التفاصيل عن حياتها العاطفية، وذلك خلال حوارها اليوم ببرنامج "واحد من الناس"، مع الإعلامي عمرو الليثي.

تصريحات ميس حمدان مع عمرو الليثي

وأضافت: "أنا مش مضربة، هو نصيب بحت، أنا حبيبة ورومانسية جدًا، ولازم أحب أوي، ومحبتش كتير بس كنت محظوظة أننا عيشت قصص حب لما بتفرج على روميو وجوليت بقول ايه العك دا".

ميس حمدان: آخر قصة حب ليا كانت من 13 سنة

وأضافت: "آخر قصة حب ليا كانت من 13 سنة، وانتهت بالفشل عشان أنا كنت صغيرة وهو كان صغير، وحصل خلافات، وشعور أني أبقى أم موجود، ومش بيجيلي عرسان، ولازم اللي اتجوزه أحبه ويبقى فيه هات وخد، ولو جالي عريس صالونات ممكن أسمعه وأشوفه".

وعقبت مي سليم قائلة: “ميس بتحب الأطفال لدرجة الجنون، ولو مسكت تليفونها هتلاقي صورة بنت هي متابعها على السوشيال ميديا، وبتقولي يا مي نفسي لما اتجوز أجيب طفلة زيها.

وأضافت: "في الماضي كنت أخاف من ركوب الطائرة، وقد حدث لي موقف طريف مع إحدى الركاب ".

تصريحات دانا حمدان

وكشفت الفنانة دانا حمدان أنها الأخت الكبرى بين أخواتها، مؤكدة على أنها لا تخجل من الإفصاح عن عمرها، وذلك خلال حوارها اليوم ببرنامج “واحد من الناس”، مع الإعلامي عمرو الليثي.

وقالت دانا: "أنا أكبر من إخواتي بكتير، ومش بتضايق لما بقول سني، لأني طلعت على السوشيال ميديا وقولت أنا عندي كام سنة، كل الناس عارفة، أنا عندي 46 سنة، وميس بعديا".

ميس حمدان تكشف عن تفاصيل علاقتها مع إخواتها

وتابعت: "مفيش بيننا حتة الإحترام، بس الشبشب مش بيترفع، واحنا صغيرين كنا بنضرب بعض".

ومن جانبه علقت مي قائلة:" احنا بنحترم بعض جدًا بس عمرنا ما تعاملنا بمين أكبر من مين، كلنا إخوات قريبين من بعض زيادة عن اللزوم، ومرتبطين ببعض زيادة عن اللزوم، والاحترام بيجيي في وقت معين، عمرنا ما حد يقدر يتخطى الخطوط الحمرا اللي بتجي وقت الجد".

مي سليم: "لو رجع بيا الزمن بردو مش هحب المذاكرة”.

وقالت مي: "مكونتش أشطر حاجة، ومكنتش بحب المذاكرة خالص، ولغاية دلوقتي لو رجع بيا الزمن بردو مش هحب المذاكرة".

أما ميس حمدان فأشارت إلى أنها عكس مي سليم في الدراسة، فقالت: "أنا كنت فعلا شاطرة، مكنتش بعمل حاجة في حياتي غير أني بذاكر وأنام بدري وأصحى أروح المدرسة، كنت ملتزمة وندمانة، وكان نفسي أبقى زي مي، وكنت شاطرة في كل حاجة".

ما علاقة مي سليم بالكهرباء وشراء الأدوية

وفي نفس السياق، كشفت دانا حمدان أمر غريب عن شقيقتها مي، فقالت: "مي مجنونة تليفونات، ولغاية دلوقتي، بتشتري تليفونات وتخليها عندها".

وأكدت مي على كلامها قائلة:" عمري ما امسك تليفون وأرميه، عندي مكان مخصص لما لا يقل عن 50 تليفون، من أول ما مسكت تليفونات، وأي تليفون مسكته معايا لغاية دلوقتي".

ميس حمدان: مي كانت بتحب تتعاكس
 

وقالت ميس حمدان في نفس السياق: "مي كانت بتحب تتعاكس، والولاد كانوا بيكلموها في التليفونات ويعملوا نفسهم بنات.

وأوضحت مي أنها كانت تفضل صداقة الأولاد عن البنات، فقالت: "أصحابي أيام المدرسة الولاد كانوا أكتر من البنات عشان كنت قريبة منهم وبثق فيهم أكتر من البنات، وأنا كنت بحاول أثبت أني البنت المسترجلة".

وواصلت مي أنا لدي فوبيا من فيشة الكهرباء لدرجة ممكن أتصل في منتصف الليل أكلم أي حد من أخواتي يحطيلي الفيشة، لأن كل ما أجي أحط الفيشة أتكهرب".

مي سليم تكشف عن هذه العادة

وأختتمت: "الأشخاص يصرفون أموالهم على الشوبينج، وأنا بصرفه في الصيدلية من أجل شراء الأدوية ".

ميس حمدان تشارك في دراما 2023 بـ "عودة البارون"

ويذكر أن الفنانة ميس حمدان تنتظر عرض مسلسلها الجديد "عودة البارون"، وهو من بطولة الفنان حسين فهمي، ميس حمدان، ريهام سعيد، علاء مرسي، خالد سليم، نهال عنبر، رزان مغربي، سامي مغاوري، والعمل من تأليف وإخراج سامر خضر الذى يخوض لأول مرة تجربة الإخراج بمصر بعد مشواره الطويل بالأردن.