عمرو أديب ينتقد سيد عبد الحفيظ
عمرو أديب لـ سيد عبدالحفيظ: "أنت جواك سواد.. حركة بلدي ولازم تتعاقب"
وجه الإعلامي عمرو أديب انتقادات لاذعة لمدير الكرة في النادي الأهلي سيد عبدالحفيظ، منتقدًا الأخير بعدما رفض المرور في الممر الشرفي بعد فوز نادي الزمالك ببطولة الدوري.
أديب: bad looser
ووجه عمرو أديب حديثه لسيد عبدالحفيظ، خلال حلقة اليوم الجمعة، من برنامجه "الحكاية"، المذاع عبر فضائية "إم بي سي مصر"، قائلًا: "أنت جواك السواد ده كله.. انت ليه "bad looser" كده يا سيد؟"، واصفًا ما فعله مدير الكرة في الأهلي بأنه "حركة بلدي يا سيد.. انت لازم تتحلى بالأخلاق الرياضية وتكون نموذج للاعبين اللي معاك في الفريق".
معاقبة سيد عبدالحفيظ
وتابع عمرو أديب: "لو لاعب عندك عمل الحركة دي كنت هتعاقبه، لكن أنت مين اللي هيعاقبك؟" مضيفًا: "سيد غلط وسيد لازم يتعاقب ومحمود الخطيب لازم يعاقبه، ولازم اتحاد الكرة يعاقب سيد".
ودافع عمرو أديب عن حق جمهور الزمالك في التحفيل على الأهلي والاحتفال بانتصارهم، قائلا: "لازم أحفل.. أسكت ليه.. امبارح مصر طلع فيها زملكاوية كتير قوي"، وأضاف: "شربنا المر، ورغم ذلك سنظل أوفياء".
هاشتاجات ضد لاعبو الأهلي
وأشار وأشار إلى كمية هاشتاجات من جمهور الأهلي كثيرة جدًا ضد لاعبي الأهلي، والخسارة عادية، قائلًا: "بحب لاعيبة الزمالك واحد واحد في كل الأحوال، وبطلب من النادي الأهلي: علموا أولادكم الروح الرياضية، وارجوكم اتعلموا ثقافة انكم تخسروا، لكن هذا التطاوس من البعض في النادي الأهلي ليه؟".
وشدد عمرو أديب على أن "الأهلي لم يخسر كده وخلاص، وأنه كان بيلعب قدام فريق جبار"، مجددًا التأكيد على ضرورة عقاب سيد عبدالحفيظ على ما فعله بعد المباراة، وقال: "اللي عمله سيد عبدالحفيظ امبارح ده ما يخليش الناس تفهم كورة، يخلي الناس تفهم السواد والغل.. لأ ما أخسرش، جمهور النادي الأهلي اتربى على فكرة عظيمة وهي إن لازم في النهاية فريقه يكسب، لكن أنا بقول لهم لا هي مش كده.. الماتش فيه بن شرقي وفيه حاجات كتيرة غير الهتافات، والحظ بيجي مع المجهود".
