بهذه الكلمات المؤثرة.. إبراهيم فخر يُهدي والده هذا المشهد من "زلزال " (فيديو)

حيث كتب إبراهيم، علي حسابه الرسمي بموقع التواصل الاجتماعي "فيسبوك": "٢٢ يناير ٢٠٠٨ كنت في القاهره راجع من الشغل الصبح ولسه نايم وجالي تليفون.. بابا تعبان وعايز يشوفك نزلت جري واول ما دخلت البيت فهمت كل وش بصيت فيه كان بيقول اللي حصل بس مكنتش مصدق .. بحضن امي واختي وعيونهم مليانه دموع وبرضه لسه مش مصدق لحد ما دخلت عليه".

واكمل فخر، :"نايم في سريره .. هو زي ماهو نفس شكله وهو نايم حسيت للحظه اني لو صحيته هيفتح ويرد عليا هزيته بالراحه وندهت .. بابا .. بابا مردش .. وهنا بس فهمت.. وفضلت باصص له وكاني بحوش صورته في عنيا بشبع منه هو اللي علمني كده اصلي شفته عمل كده مع جدي برضه حتي في دي قلدته الله يرحمك يا بابا .. نص الفرحه اللي في الدنيا خلصت لما رحت كل فرحه بعد منك نص فرحه فرحت لما خلفت نص فرحه عشان كان نفسي تشيل عيالي فرحت وانا بتجوز نص فرحه عشان كان نفسي تبقي جنبي ".

وتابع كلامه قائلا:"حتي لما اشتريت أول عربية كان نفسي تركب جنبي فيها او نسافر بيها سوا ..النهارده مش عيد ميلادك ولا ذكري وفاتك بس النهارده عملت مشهد طلعت فيه كل اللي كنت حاسه ومش قادر اقوله من يوم ما غيبت.. والنهارده بهدي المشهد ده ليك .. وبرضه فرحان نص فرحه .. عشان نفسي تشوفه".

مسلسل "زلزال" تأليف عبد الرحيم كمال، إخراج إبراهيم فخر، إنتاج شركة سنيرجى، بطولة محمد رمضان، حلا شيحة، ماجد المصرى، منى عبد الغنى، هنادى مهنى، حسام داغر، أحمد صيام، سامى عبد الحليم، محمود حجازى، محمد سليمان، تامر ضيائى مصطفى منصور، يوسف عثمان، آية هلالى، حنان سليمان، لمياء كرم وعدد آخر من الفنانين من انتاج شركة سينرجي.