المستشار بريك ينتقد ظاهرة الأحضان و"البوس" بين الرجال
انتقد المستشار سامى بريك، الرئيس بمحكمة الاستئناف، والقاضى بمحكمة جنايات طنطا، ما أسماه ظاهرة البوس والأحضان بين الرجال، وقال إنها انتشرت بشكل مخيف، وطالب بالإقلاع عنها حفاظا على «رجولتنا»، وذلك فى تدوينة له على صفحته الشخصية على موقع التواصل الاجتماعى «فيس بوك».
وقال المستشار «بريك» فى تدوينته: «ظاهرة البوس بين الرجال باتت تستحق الدراسة، لأنها زادت من وجهة نظرى التى قد لا تعجب البعض عن الحد، وقديما كان من النادر لما تلاقى راجل بيبوس راجل- أقصد من الخدين عشان محدش يفهمنى غلط- وكان ده منتشر فى المدن».
وأضاف: «النهاردة انتشرت الظاهرة فى الريف بشكل مخيف، وعادى جدا لما تلاقى راجل واخده آخر بالحضن، ورازعه مش بوستين واحدة يمين والتانية شمال.. لا لا.. وحياتك أربع بوسات قريبة من الفم مع طبطبة، ورزع على الضهر بطريقة ممكن تكسر الضلوع، وممكن ميكنش بيحبه إنما تقول إيه موضة».
وقال فى تدوينته: «لو حابب أقرب لك الصورة، لو حضرتك رحت تؤدى واجب عزاء شوف المبوسة والمهازل اللى بتحصل، وكتيرة جدا فى الريف تلاقى طابور أهل المتوفى واقف فيه خمسين راجل صف واحد باين عليهم الإرهاق والتعب، والأخ داخل منشن على اللى يعرفهم فى الطابور وهاتك يا أحضان وطبطبة وبوس من الخدين، معطل الطابور، وده دخولا وخروجا، واللى يزعل إن ده بيحصل والقرآن شغال».
وتابع: «الأغرب من كده، الرجالة المنتشرين بين الصفوف، لازم ينولهم من البوس جانب، وعشان يوصل للى حيبوسه يفعص لك رجلك مفيش مشكلة، وهاتك اتفضل هنا يا حاج، تعالى هنا يا هندسة.. كأننا فى فرح دون مراعاة حرمة الموت».
واختتم قائلا: «يا سادة دعوة مخلصة.. تعالوا نترك هذه العادة القبيحة ونعود لسلام الرجال باليد فقط بدون بوس ولا أحضان، حفاظا على رجولتنا، ومنعا لانتشار الأمراض، وما أكثرها.. اللهم بلغت».
وقد أثارت هذه التدوينة جدلا بين القضاة، ومنهم من أكد أن هذا الأمر فى الخارج يعتبر «شذوذاً جنسياً»، وفقا لما قاله المستشار محسن هيكل، الرئيس بمحكمة الاستئناف، والقاضى بمحكمة جنايات الإسكندرية.. «فى أوروبا ينظر إلى من يفعل ذلك أنه من المثليين».
وتهكم آخرون مثل المستشار محمد خلف، الرئيس بمحكمة الجنايات، والمستشار محمد الديب، القاضى بمحكمة الجنايات، الذى قال: «ممكن واحدة من النص وخلاص معالى الباشا»، وعقب المستشار محمد ناصف، قائلا: «البوست ده يستاهل 100 بوسة معالى المستشار».
