هالة صدقي: "شخصيات وضيعة"تقف وراء الهجوم على الفنانين
انتقدت الفنانة هالة صدقي، ردود فعل بعض رواد مواقع التواصل الاجتماعي بالهجوم على الفنانين الذين حضروا مباراة مصر وروسيا ضمن فعاليات كأس العالم.
وكتبت هالة، عبر حسابها على "فيس بوك": "للأسف ما كنتش عايزة اكتب في الموضوع ده تاني إلا أن الاستفزاز من بعض الشخصيات الوضيعة واللي الحقيقة توضح مدى ظهور الإخوان أو الطرف التالت المنظم مرة أخرى للأحداث، وطبعًا عدوهم اللدود الثقافة والفن والفنانين اللي نزلوا في التحرير واللي وقفوا قدام وزارة الثقافة وأصروا على رفض وإقاله الوزير الإخواني، الفنانين اللي بيحبوا بلادهم واللي بيكونوا جاهزين في أي وقت تطلبهم فيها، حتى لو كان ماتش كورة، وطبعًا لا يمكن حد يقول لا".
وتابعت في منشورها: "ولما شريف منير يقول إحنا أخدنا الطيارة والإقامة فقط ومن غير ما ناخد أي فلوس، لأنه الحقيقة لم يوضحها أن المجموعة كلها تم الاتفاق معاها على إعلان لشركة we، والدليل أنهم كلهم لابسين التيشيرت اللي عليه we حضرتك أو سيادتك مش شايف أنهم نجوم لكن هما في الواقع نجوم مصر اللي الوطن العربي كله يقدرهم مليون مرة عن مصر".
وأضافت: "كل النجوم لما بيصوروا أي برنامج خارج مصر لازم الشركة تبعت التذكرة والإقامة ونظرًا أن دي شركة وطنية فجميعهم رفضوا أن يكون الإعلان بمقابل وهذا ليس جديد على الوسط الفني اللي كل من هب ودب أهانهم، والدليل لحضراتكم إعلانات الشحاتة لكل المستشفيات والجمعيات، وطبعًا ده كله من غير مقابل، وللأسف زميلي شريف لم يشرح الوضع بالتفصيل، على أي حال الإخوان بطبعهم بينتقموا من الفنانين في أي مناسبة وللأسف استغلوا حالة الغلاء واللي بالطبع كلنا بنعاني منها".
