حلا شيحة: "مشوفتش كره للنقاب إلا في مصر بلدي حبيبتي"

وأضافت شيحة، عبر حسابها الشخصي بموقع "فيسبوك"، قائلة: "أنا عايشة في كندا بقالي حوالي سنتين و نص، لابسة النقاب و لي جيران يحترموني و علاقتي بيهم طيبة، وهما في كندا شايفين ان ده حرية شخصية و انا بمشي في الشارع عادي و مش بخاف من حاجة بفضل الله، وسبحان الله جارتي مسيحية و كنّا بنتكلم عن الحجاب و جارتها سألتني ليه لابساه هي ردت عليها و قالت ده لَبْس المسلمات و شكلهم سواء الحجاب أو النقاب". 

وتابعت شيحة: "فرحت جدا بردها و تفهمها و احترامها للمسلمين، الحقيقة مشفتش كره للنقاب الا في مصر بلدي حبيبتي، والنقاب علي فكرة من الاسلام و النقاب لَبْس امهات المؤمنين و علي فكرة لو كان تغطية الوجه لا تصح في الاسلام كان سيدنا النبي امر امهات المؤمنين بكشف الوجه، وهما الأولي بتطبيق منهج الله، و هل سيدنا النبي خاطئ في امر تغطية الوجه و حشاه ذلك، و هل ايات الله التي امر الله فيها النساء بالحجاب نزلت خطاً !!!!!".

واستطردت شيحة، قائلة: "مش فاهمة هي الناس دي عايزة ايه و بتحارب المحجبات و المنتقبات كدة ليه 

و يعني ايه ده مش هوية مصر، سواء مصرية او عربية كلنا عرب و غالبيتنا مسلمين موحدين، هويتنا الاسلام، روحنا الاسلام، مظهرنا الاسلام، لو ده بيغيظ ناس هما حرين، سبب تفرقنا فعلا اننا احنا بقينا عنصريين، عايزين كل بلد عربي مستقل، و انا مصري و انا سعودي و انا عراقي، علي فكرة احنا أمة واحدة، احنا فعلا محتاجين نرجع للقران و نفهم كلام الله، و كفاية بقي الكلام عن النقاب، كإن الأزمة العربية كلها سببها النقاب، و سيبنا البلاوي اللي بنعاني منها من تعليم و صحة و نظافة و أمانة و اخلاق فاسدة، ونركز بقي في المنتقبة".

واختتمت :"معلش اعذروني، مصر في انهيار وبيتكلموا عن النقاب، و كإن بقي عايزين يعيشوا في مصر لوحدهم، وعايزين هوية علي مزاجهم، والله لن ننتصر إلا برجوعنا لمنهج الله كامل، زي ما قال سيدنا النبي، خير الناس قرني، لو رجعنا بأخلاقنا و تمسكنا بعقيدتنا زي عهد سيدنا النبي، لرجعنا خير أمة، وان شاء الله سيظل الاسلام عالياً، لن يطاله احد مهما تتطاول، و سيبقي الاسلام و يرحل البشر،الي جنة ٍاو نار، هنيئاً لمن تمسك بدينه وسط هذه الفتن".