قبل عيد الحب.. 7 حيل طريفة للهروب من هدية الفلانتين (تعرف عليهم)

وبالتزامن مع تحضير المحبين للهدايا، هناك البعض منهم يحضّر للاحتفال ولكن بطريقة أخرى، وهي الهروب من شراء الهدية، "الفجر" تواصلت مع عدد من المواطنين وطرحت عليهم سؤال "إزاي تخلع من حبيبك قبل الفلانتين" ليكشفوا من خلال ردودهم مجموعة من الطرق الطريفة التي تمنحك الهروب من هدية الفلانتين.

رأت تهاني طارق، أن المرض هو الحل، فقالت: "لو البنت عاوزة تخلع من هدية الفلانتين تعمل نفسها تعبانة وإنها مش قادرة تنزل خالص تقابله، وتفضل كده أسبوع لحد ما ينسى أصلا، وممكن تنزل تقابله وتقوله بحضرلك الهدية، وتاخد هديتها وتتعب بعدها عادي، هو هيروحها وينسى ولو سأل اعمليها زعلة وقوليلوا ايه ده أنت مش خايف عليا الهدية أهم مني".

أشارت عبير إدريس، أن الحل في المثالية الزيادة فقالت: "البنت اللي مش معاها فلوس وعاوزة تخلع من هدية الفلانتين بشياكة ممكن تشتري وردة واحدة بـ2 جنيه، وتقول لحبيبها او خطيبها أو جوزها إن الهدايا مش بثمنها إنما بقيمتها وإنها حبيت تشوف رد فعله في هدية ثمنها قليل كده هيكون إيه".

وقالت أية محمد، أن الطريقة الوحيدة التي ستعفو عن الفرد حرج عدم شراء هدية الفلانتين، هي عدم الإيمان بفكرة وجود يوم للحب، موضحة: "من الأول أعملي نفسك مش مقنعة بيوم الفلانتين وأنك مش بتحبيه ولا بتحبي فكرة أن فيه يوم واحد بتحتفلي بيه للحب وبكده هتخلعي من الهدية وبشياكة".

وسخرت إيمان إسماعيل قائلة: "السخرية هي الحل الوحيد اللي هيخليكي تخلعي من هدية الفلانتين، انك تعملي نفسك بتهزري وتجيبي هديته وترجعيهاله بلفة جديدة، رجعي نص الهدية وقوليلوا إحنا بنتقاسم كل حاجة مع بعض".

وأضاف حنفى النواوي، أن السفر هو الحل، قائلاً: "الراجل اللي مش بيجيب هدية في الفلانتين بتكون سنة سودة عليه، علشان كده لازم يكون فيه حجة كبيرة تغفرله الذنب ده، وممكن يكون السفر وسيلة حلوة للهروب".

وأشار زكريا محمد أن الاكتئاب هو وسيلة الهروب الوحيدة من هدية الفلانتين، فقال: "قبل عيد الحب الواحد يعمل نفسه مكتئب ويخلق مشاكل ويعيش دور الاكتئاب أوي علشان البنت ميبقاش ليها عين تقوله فين هديتك".