صيادون يروون تفاصيل جديدة في حادث "مركب رشيد" (فيديو)

روى السيد جمعة، أحد صيادي قرية الجزيرة الخضراء التابعة لمركز مطوبس بمحافظة كفر الشيخ، تفاصيل جديدة حول مركب رشيد المنكوب الذي راح ضحيته نحو 168 غريقًا، بينهم عشرة أشخاص من محافظة كفر الشيخ.


وقال جمعة، "إنهم شاركوا في انتشال جثث المصرين والأفارقة من المياه"، معبرًا "طلعنا يوم الخميس تاني يوم غرق المركب لقينا الجثث عايمة زى الطماطم على المياه بقينا نجر فيها علشان نطلعها بالغزل".


وأضاف: "يوم الجمعة لقينا الجثث عايمة ولنشات الحربية كانوا بيخدوا مننا ومنزلوش والمركب غرقان بينه وبين الشط 2 ميل وكانت مركب الصيد توصله في ربع ساعة، أما المركب الحربي تجيبها في دقيقتين".


وقال أحد صيادي مركز مطوبس، إن هناك مئات الجثث داخل عنابر وثلاجة المركب من بينهم أطفال ونساء قام طاقم المركب بغلق الأبواب عليهم لعدم الصعود على متن المركب، حفاظًا على اتزانه، ما أدى إلى مقتل عدد كبير من المهاجرين.


وأضاف "جمعة"، أن مهربي البشر بشراء مراكب صغيرة متهالكة للخروج فى رحلات هجرة غير شرعية قائلًا، "أصحاب الشغل بيقعد وبيشوف عيلين من "السرسجية" يجيبوا ليهم مراكب عمرها 30 سنة ومتهالكة وغير مصرح بيها علشان يستخدموها فى رحلات هجرة غير شرعية والسمسار بيشتريه علشان يكسب والمركب مش بتشيل الناس وهو مكانه وبالتليفون بيجمعوا الناس".


وتابع: "في عز النهار ناس نازلة على مراكب هجرة غير شرعية واحنا شايفينها،كل المراكب بتطلع والسماسرة بيخزنوا الناس فى المنازل القريبة من البحر ومفيش حكومة ولا تفتيش والشط ده كله ملوش رقابة والعربيات بتلم الناس من على الشط وفى عز النهار واحنا بنشوفه".


وواصل: "المركب اللى فى المياه لسة فيه يمكن 200 شخص وطلعنا اللنش الحربى قال متشتغلوش وروحونا وجاب 14 شخص بس رغما اننا طلعنا كتير وضحك علينا وفضلنا لما الليل جه ومجبش حد وطلعنا تانى يوم كانت الجثث زى الطماطم ونقلناها بمراكب صيد صغيرة ومفيش مسؤول سأل".