بالبلدي .. "شوية نقاط .. بعد سوبر الإمارات"

انفض المولد وانتهى الموسم الكروي المصري بمباراة السوبر المحلي والتي أقيمت برعاية إماراتية على ستاد هزاع بن زايد وتوّج بها النادي الأهلي بالفوز على منافسه التقليدي الزمالك بثلاثة أهداف لهدفين .

ولن أتحدث عن التحليل الفني للمباراة خاصة في ظل تقارب الفريقين ونقاط التحول في المباراة وغيرها من الفنيات والتي قامت الاستوديوهات التحليلية المختلفة "بهرسها" طوال الساعات الأخيرة .. ولكن سنتحدث قليلاً "بالبلدي" عن شوية نقاط حصلت في الماتش .

*الأهلي بدون حسام غالي .. زي برشلونة بدون ميسي ... مش فنياً ولكن حاجات تانية كتير .. قيادة وروح وتوجيه لاعيبه ... تستحق يبني لقب أفضل لاعب في المباراة .. راجع حساباتك يا كوبر غالي مطلوب في المنتخب .

*مرتضى منصور معاه حق أن فيريرا سبب الخسارة طبعا وأنه في الماتش ده فاشل فاشل زي ما قال .. بس فكرة أنه "يطفشه" بمدرب عام بصلاحيات فنية تفكير "فاشل فاشل فاشل" .

*الأهلي مش ملتزم بأي ارتباطات "مصيرية" وحتى لو كان مرتبط فتعلمنا زمان أن الأهلي هو نادي "المبادئ" أو هكذا يدعون ..... لو مشفناش عقوبة محترمة من جوا النادي على رمضان صبحي فمحدش يتكلم عن المبادئ من تاني .

*الشناوي .. تألقت في المباراة وتصديت لفرصتين محققتين ولكنك مفروض "حارس مصر الأول" ولازم تطور من نفسك في ضربات الجزاء .. مش عيب تتعلم من جنش ... وحافظ على نفسك بالبعد عن الغرور لو عاوز تفضل رقم 1 .

* رمضان صبحي .. كتبت عنك زمان أنك من اللعيبة "مستقبل مصر" .. نصيحة يبني لازم تكبر شوية .. أبوتريكة قدامك وشيكابالا قدامك شوف عاوز تكون زي مين .

*جمهور التراس أهلي وزمالك .. أخبار العقلية والكورة للجماهير إيه ؟؟؟ نفسي تفهموا بقى أن الكرة فعلا للجماهير بس انتم تبدأوا تغيير .

*باسم مرسي .. ماتشات كتير تؤكد أنك "مهاجم مصر الأول" .. وماتشات تانية تؤكد أنك "تايه" ومش عارف بتعمل ايه ... ركز يبني الزمالك معتمد عليك والمنتخب كمان .

* محمد إبراهيم .. إيه اللي رجعك من البرتغال بس ؟

* صالح جمعة .. الحق نفسك يبني .. فتحي مبروك وزيزو الاتنين اتفقوا أنك "خارج الخدمة" .

* يعني إيه كهربا يختار بنفسه يشوط ركلة جزاء رغم رفض المدرب ؟؟ طب انت يا كهربا مش مقتنع أن مصر كلها انتقدت تسديدة مباراة النجم في نص الجون تقوم تشوطها تاني في النص ! ... شيلت الليلة كلها يا كهربا .

* لقطة متعب وغالي .. دي الروح اللي بتفرق واللي بتجيب بطولات وتحية واجبة للمحترم متعب والقائد غالي .. بس تفتكر يا متعب مجاش الوقت أنك تقولهم انا كده كفاية وهعتزل بقى !

*مرتضى منصور ومحمود طاهر .. عاوزين نشوف رؤساء نادي كبار بقى .. بس خلاص .

*جنش ومؤمن زكريا .. احتفلوا زي ما تحبوا بس بطلوا عبط انتم الاتنين .. ربنا كرمكم بالعقل .. بلاش تفكرونا بالمثل بتاع "يا واخد القرد على ماله .. يروح المال ويبقى القرد على حاله" .