"احنا جامدين أوي".. أبرز ما قال"السيسي" خلال افتتاح مشروعات بالمنوفية

افتتح الرئيس عبد الفتاح السيسى، مستشفيي بنها للتأمين الصحي، و 15 مايو من قبل إدارة المشروعات الكبرى الهيئة الهندسية للقوات المسلحة، عبر الفيديو كونفرانس.

وخلال زيارته لحضور افتتاح مشروعات تنموية بمحافظة المنوفية اليوم الإثنين، ناشد الرئيس المواطنين بضرورة الحفاظ على المشروعات الصحية الجديدة، موضحا: "بقول لكل المصريين اللى بيتفرجوا على الافتتاحات دى اليوم.. لو مكنش عندنا سبيل إننا نحافظ على المنشأة الطبية اللى اتعملت بالشكل ده.. أدائها هيتراجع خلال عامين أو ثلاثة".

وقال الرئيس عبد الفتاح السيسي، إن مصر دولة قوية، وجاهزة لإنجاز أى مشروع، وأكد الرئيس السيسى استعداده للمشاركة فى إنجاز مجمع الغزل والنسيج، قائلا: "المشروع 5 مراحل، يتم تنفيذهم فى 7 سنوات، وخطوة إنشاء مصانع الغزل والنسيج ستكون فى المرحلة الخامسة آخر حاجة، واللى قبل كده بنعمل مراحل أخرى مهمة".

وأضاف خلال حضوره افتتاح عددا من المشروعات التنموية بمحافظة المنوفية: "احنا مستعدين نقدم كل التسهيلات عشان المشروع ده يخلص فى 3 أو 4 سنين، واحنا مستعدين.. احنا جامدين ومصر دولة جامدة، وجاهزين نخش بـ 50% معاكم"، في إشارة إلى الجانب الصيني. 

وقال الرئيس، إن مصر تفقد تقريبا 20% من القيمة الحقيقية للإنتاج فى قطاع السكر نتيجة المصانع القديمة، متابعا في تعقيب له خلال كلمة طارق قابيل وزير التجارة والصناعة على هامش افتتاح عددا من المشروعات التنموية فى المنوفية: "قطاع الأعمال مش قادر يحل المسألة، ومش عيب في الوزير، ولكن التحديات اللي جوه الموضوع كبيرة".

وقال الرئيس، إن النمو الذي تحققه الدولة لابد أن يتعاظم، ونقفز بمعدلات التنمية فى مدد زمنية أقل من الآن بكثير، مشددا: "حجم العمل الذى يتم توفيره للشباب يجب أن يكون أكبر من الحالي".

وقدم المهندس طارق قابيل، وزير الصناعة والتجارة، الشكر للرئيس عبد الفتاح السيسى على دعم القطاع الخاصة بصفة عامة والصناعة بصفة خاصة، ورد الرئيس عليه قائلا: " إحنا بنضيع وقت كتير فى إعادة تأهيل مصانعنا، وعندنا صرح كبير كان معمول من الخمسينيات".

وأضاف الرئيس السيسى فى كلمته ، أنه قال للقائم بأعمال رئيس الوزراء المهندس مصطفى مدبولى فى وقت سابق، "لو هتمشوا فى مسارات إصلاح تقليدية مش هتخلصوا مع البيروقراطية والدراسات، وهتلاقوا نفسكم قاعدين".

وتابع: "إحنا بنتكلم مثلا على مصانع السكر، والأهالى فى الصعيد عايزين ناخد منهم القصب بسعر كويس، وده من حقهم وفى نفس الوقت المصانع اللى موجودة من الخمسينيات والستينيات بقت خارج الخدمة، وتكلفة التشغيل الخاصة بها عبء على الشركة".

واستكمل: "عشان نعمل تطوير لازم نتجاوز السلبيات، وعندنا إشكاليات، ومحتاجين نحط إيدينا فى إيدين بعض؛ عشان نحلها، لكن فهم المصريين للقضايا مساعد الحكومة".

وأكد الرئيس عبد الفتاح السيسى، استعداد صندوق تحيا مصر؛ لدعم علاج مرضى فيروس سى، قائلا :"إحنا بنفيد المصريين لما بنحل المسألة، ونعالج مريض أيا ما كان سنه، أو نوعه، ولذلك لازم نزيح عنه المرض، وقتها نبقى بنعمل حاجة عظيمة".

وأضاف الرئيس السيسى فى كلمته: "أنا أعتبر مدة علاج فيرس سى طويلة، لأن كل إنسان مريض بفيروس سى كل يوم بينام متألم والمحيطين به، لذلك أنا مستعد للدعم من صندوق تحيا مصر اللي اتبرع فيه المصريين، إذا كان للموضوع تكلفة مالية مستعدون بالدعم من الصندوق".