محمد رمضان .. الوردة اللي فتحت بعد النحت في الصخر
بستغرب من الناس اللي بتربط حياتها كلها بنتيجة الثانوية العامة .. بتشوف أنها هي مصدر النجاح الوحيد .. الحقيقي اني يوم النتيجة .. اتصدمت.. بس اتعلمت أن ثانوية عامة مش النهاية.. ثانوية عامة خطوة لخطوات كثيرة هتعدي بيها..
عمر الأرقام ما بتصنع تاريخك.. ولا شهادتك هتحقق نجاح لوحدها.. حدد هدفك .. وأحلم .. وأبدا نفذه وصلي علشانه.. الحلم هو اللي هيصنع مستقبلك.. خليك متمسك بحلمك؛ حارب علشان تحققه؛ مهما كانت العواقب..
اوعى تيأس.. اوعى تقع.. ولو وقعت خلي وجعك عكازك علشان تقوم؛ قوم؛ فوق؛ عيد حساباتك؛ ومسيرك تحققه!
نيجي للموضوع بقى..
النهاردة أول مرة أكتب عن الفن بعيدا عن الرياضة ولأنها حاجة مختلفة فكان لازم الشخص يكون مختلف.. محمد رمضان
إشمعنى هبدأ برمضان ؟ الأجابة ببساطة .. مش لأنه اهم ممثل في الوقت الحالي.. أو انه نجم الشباك الأول.. أو لأن لما فيلمه بينزل تحس أن حصل زلزال في البلد.. لأ.. كل دي حاجات عادية موجودة في أي فنان..
الفرق بين محمد رمضان وأي فنان أخر .. هو صناعة الحلم.. أنك تخلق حاجة من العدم.. حاجة مش موجودة غير جواك انت .. انت بس اللى حاسس بيها .. وتحاول تقنع اللى جنبك، اللى منك.. لحد ما يقرروا يمشوا وراك..
محمد رمضان خلص ثانوية عسكرية وقال لوالدته "انا مش عايز اشتغل"
أول سؤال جه جوه دماغ والدته تسأله "لية؟"
قالها بتلقائية "لأني هروح القاهرة وأققدم في فنون مسرحية .. انا عايز أكون ممثل يا أمي؟".
ووافقت الأم وحاولت تطبطب عليه وتأكد انه موهوب.. وطول ما هو ماشي صح، فثقة في الله هتنجح..
قدم في المعهد وكان من المفترض انه ينجح ويبدأ حياته ممثل صغير ويكبر.. بس اللى حصل عكس كدة خالص.. متقبلش في المعهد..
ساعتها مقالش انا فاشل وخلاص كدة الموضوع اتقفل؟ واروح اشوفلي كلية تانية.. لأ بالعكس.. قعد سنتين من غير دراسة.. كان بيقول لنفسه انا ممثل ومش هعمل غير الحاجة اللي انا بحبها وشايف نفسي فيها..
المشكلة انه كان جاي مش عارف حاجة عن القاهرة.. فسأل الناس، إزاي اققابل مخرجين ومنتجيين؟ اتقالوا "وسط البلد".
وبدأت رحلته في وسط البلد .. فضل يقتحم على المخرجين مكاتبهم علشان ياخد فرصة.. لدرجة انهم كانوا بيطردوه من الاستديوهات..
يوم من الأيام كان معدي من قدام مسرح وكانت فيه مسرحية شغالة لسعيد صالح اسمها "قاعدين ليه".. سلم على الراجل بتاع الأمن وقاله انا ممثل وعايز اققابل سعيد صالح أو مخرج المسرحية.. وكالعادة اتقاله ممنوع ..
محمد رمضان مفكرش في حاجة غير انه لازم يدخل.. هو مجاش لحد هنا ووصل للمسرح علشان يتقاله لأ.. وفعلاً دخل وراح لسعيد صالح..
انا عايز امثل .. وكل ما اروح لمخرج يقولي سيب صورتك وانا عيني مش خاضرة ولا شعري اصفر علشان اسيب صورتي.
محمد رمضان مداش فرصة لسعيد صالح انه يتكلم وبدأ يمثل قدامه شوية شخصيات.. لحد ما الفنان الراحل قام قال عليا الطلاق انت هتمثل قدامي النهاردة على المسرح.. وفعلا بدأ التمثيل.. ودور يجيب دور.. ومسلسل يجيب مسلسل.. وفيلم يجيب فيلم.. والبذرة تكبر.. والوردة تفتح..
رغم ان وصل لحلمه ألا انه كان بيشتري كتب المعهد علشان يذاكر فيها..كان عايز موهبته تكون مقترنه بدراسة وفعلا نجح.. لحد دوره في إحكي يا شهرزاد اللى كانت ناقلة في حياته الفنية بعدها دخل المعهد واتخرج منه..
وصل لكدة إزاي؟ اعتقد لأنه كان حاطط قدامه هدف..
ثقة في الله .. نجاح
والله يرحمك يا سعيد يا صالح..
