طباعة

ريهام الجريتلي تكتب: "خليك جنب أمك يا ...."

الخميس 17/01/2019 01:13 ص

الفجر

ريهام الجريتلي

الراجل اللي انفصل عن مراته ومش راضي يطلقها أو بيزهقها ويموت فيها بالبطيء علشان تخلعه علشان ميدفعش نفقة وسكن ويديها حقوقها اللي هي أصلًا هاتصرفها على أولاده واللي هو مابيصرفش عليهم ومعندوش أي فكرة يربيهم إزاي لانه شخص غير مسؤول.

انتو إزاي بجد بتقدروا تعملوا كده؟!، مفكرتوش في أولادكم لما يكبروا  نفسيتهم هتكون إزاي وهما عارفين إن امهم هي اللي فنت حياتها علشان أبوهم مكنش موجود أصلا!، طب مافكرتوش في حسابكم عن ربنا؟!

هروبك من دورك كأب واللي فاكر إنك بكده خلصت من المسؤولية وهترتاح، لا خالص انت بس مفكرتش إن ربنا كبير وإن كل ده متحوشلك وهتدفع تمنه لما تموت على سريرك وتتمنى إن ربنا يسامحك.

لو انت دلوقتي بتتهرب من مصاريف البامبرز بتاع ابنك أو بنتك، أحب اقولك ان البامبرز ده انت اللي محتاج تغطي بيه مؤخرتك وعارك اللي هيفضل ملازمك طول حياتك.

ابنك او بنتك لو دلوقتي صغيرين وبيتضحك عليهم بكلمتين بكرة هيكبروا ويفهموا ان كان بإيديك تبقى في نظرهم راجل وأب محترم لكن إنت قررت تبقى العكس، وقتها هايفهموا إن حظهم السيء في وجود اسمك ورا اسمهم في البطاقة!

كلمة أخيرة
يا تبقوا رجالة ولما تتجوزوا تحافظوا على بنت الناس اللي اخدتوها من بيت أهلها يا تسيبوا بنات الناس في حالها و"تخليك جنب أمك".