منة بدر تيسير: "عبد الرحمن أبو زهرة ممثل عظيم بيحترم مهنته"
تحدثت الفنانة منة بدر تيسير، عن كواليس تعاونها مع الفنان عبد الرحمن أبو زهرة، لافتة إلى أنه يتمتع بذوق شديد، وطاقة إيجابية كبيرة، وذلك من خلال حسابها الشخصي على موقع التواصل الاجتماعي "فيسبوك".
كتبت منة بدر تيسير، منشورًا قالت فيه: "الأستاذ عبد الرحمن أبو زهرة، تجربتي مع هذا الفنان الجميل الأستاذ العظيم اشتغلت معاه في أول مسلسل في حياتي العميل ١٠١، كنت أول مرة أقف قدام الكاميرا، إنسان في منتهي الذوق و لذيذ، و بيحب يهزر مع الصغير قبل الكبير، وكان طول الوقت طاقه إيجابية و خوف علينا و على العمل ككل".
وتابعت منة بدر تيسير قائله: "بعد كده اشتغلت معاه السنه اللي بعديه في مسلسل نقطة نظام وكان طلع جدي ف قربنا من بعض أكتر؛ لإن كان معظم شغلي معاه ومسلسل ده كان في سفر في الغردقة وكان وقت امتحانات آخر السنة بتاعتي وكان بيقعد يذاكري و كان واخد باله مني لما أمي كانت بتنزل القاهره يوم و ترجع لظروف شغلها كان بيقعد يقولي يا بت عايزة حاجة ويفضل يطمن، كان طاقه كلها حنان و حب خير لكل ناس مش أنا يعني بشكل خاص و توجيه نصائح بشكل قمه في ذوق و الأدب و خفة الدم يفتح نفسك علي الشغل".
وأضافت منة قائله: "كنت في أول حياتي و صغيرة جدًا احتواني أنا وكل اللي كانوا معايا، واشتغلت معاه كتير بعد كده بس كنت كبرت شوية، اكتشفت إن الرجل ده عظيم و بيحترم مهنته جدًا و بيحترم الممثل اللي بيمثل معاه لدرجة كبيرة وعارف يعني إيه إن لحظه دي مهمة دلوقتي عند الممثل اللي قدامك بيهيء له الجو المناسب عمره ما شتتني ولا ضايقني ولا قلل مني طول الوقت كان في ضهري أنا واللي زي كويس مع الصغير قبل الكبير، في سفر بقى مع شباب لسه في الأول أو مع ممثلين كبار أو مع العمال أو أي فرد كان في العمل".
واختتمت منة كلامها قائله: "أنا حبيت أقول تجربتي مع الفنان العظيم خفيف الدم و اللي بيحب البهجة و الهزار، ويمكن ده عمل سوء تفاهم عند بعض الزملاء المواضيع كبرت وقتها،مفيش حاجة اسمها ساعتها، الأستاذ الفنان العظيم عبدالرحمن أبو زهرةانت شرف لأي عمل ولأي فنان إنه يشتغل معاك وشرف لينا و افتخر إننا في بلادنا فنان و انسان عظيم زيك، وأنا مليش في التطبيل و الجو ده أنا بقول حق الله".
وفي سياق آخر، تشارك منة بدر تيسير حاليًا في فيلم "ساعة شيطان"، وهو بطولة باسم سمرة، محمد عز، مصطفى أبو سريع، أحمد سلطان، مي القاضي، تأليف د. أحمد عثمان، إخراج إبرام نشأت، والفيلم يدور في إطار الإثارة والتشويق، وتدور أحداثه حول مجموعة شباب تدفعهم الظروف لمصير مجهول يتحكم به شيطان من الإنس ممثل في تطبيق إلكتروني حيث يتسلل إلى هواتفهم الذكية ويسيطر على حياتهم.
