عمرو سعد ينعى هيثم أحمد زكي للمرة الثانية برسالة مبكية

نعى الفنان عمرو سعد، الفنان الراحل هيثم أحمد زكي للمرة الثانية عبر حسابه بموقع التواصل الاجتماعي "فيسبوك".

 

وكتب عمرو سعد رسالة مؤثرة قائلاً: "احساس صعب ومؤلم وصادم بيخليني أقف فجأة وكأن الحياة بتجبرنا ساعات نتأمل ونبص علي كل اللي فات وساعتها تدخل الاحاسيس في بعضها كأن العربية فرملت فجأة وبعدها هدوء تام ."

 

وتابع:"فعلا حزنت وهربت دموع من جوايا كأنها كانت مكتوبة باسمك وكأنك اخويا وكأني مسؤل عنك ..، وكأن إحساسك بالوحدة واليتم جوايا ...، وفضل الإحساس ده يهاجمني من وقت للتاني مش عارف ليه وكان بيدفعني اطمن عليك او احاول ادعمك علي قد ما اقدر ... ومش هانسي لما قولتلي انك بتحس اني اخوك في ناس ممكن تقصر في حق الكلمة والوعد وتستمر الحياة الصعبة اللي بتزداد توحش وصراعات وأنانية نست الإنسان حاجات كتير قوي وتاهت فيها المسميات وبقت معانيها مزيفة لان غاب عنها الإحساس ."

 

واختتم:" علشان كده يا هيثم انت ما كنتش انت بس اللي وحيد ..،والنهاردة انتهت وحدتك يا حبيبي ويتمك وضعفك . النهاردة انت هاتكون في حضن أغلي واعز الناس أمك وأبوك ...، النهاردة انت في أمان الله وفي رحمة الرحمن ...، النهاردة البداية مش النهاية طريق سفرك كان قصير وصعب خلي الحبايب تشبع من حضنك وانعم بنعمة الحب الصادق والقرب من الرحمن الرحيم واحنا ما حليتناش حاجة غير شوية حزن وجرح جديد والدعاء ليك وانا بادعيلك بكل صدق بالرحمة والخير وان كان الطريق طويل او قصير في يوم هنتلاقي ..، سلام."

 

بهذا الكلمات نعي الفنان عمرو سعد زميله الراحل هيثم احمد زكي الذي رحل عن عالمنا فجر اليوم الخميس عن عمر يناهز الـ 35 عاما بعد تعرضه لهبوط مفاجئ في الدوره الدمويه لتوفي علي أثرها داخل منزله في الشيخ زايد.

 

والفنان هيثم أحمد زكي مواليد أبريل 1984 وهو ابن الممثل الراحل أحمد زكي والممثلة الراحله هالة فؤاد، بدأ مشواره الفني عام 2006 عندما قام بإستكمال ما تبقى من مشاهد فيلم حليم بعد رحيل والده أحمد زكي، ليقوم بالعام التالي ببطولة فيلم البلياتشو، لكنه توقف عن العمل الفني لثلاث سنوات قبل أن يعود عام 2010 من خلال مسلسل الجماعة، ليشارك بعدها في العديد من الأعمال ما بين السينما والتلفزيون.