هية مش جوازة وخلاص!

فضفضة

صورة أرشيفية
صورة أرشيفية


السلام عليكم ورحمة الله
كيف اخبارك استاذة نيفين .. من فترة وانا نفسي ابعت رسالتي لكن مترددة حاسة ان مفيش حد يقدر يساعدني في مشكلتي انا اسفة علي كلامي دة .. لكن قلت اجرب يمكن يكون باب لحل مشكلتي .. الخلاصة انا مخطوبة لانسان مقدرش اقول اني بحبه لكن هوة عمل فيه معروف كتير في مواقف صعبة لكن مشكلتي اني اقدر اكمل معاه انه عايزني ابقي نسخة من النموذج اللي هوة عايز يشوفه في البنت اللي هيتجوزها .. بمعني .. بيجبرني مثلا علي الاعتذار لمجرد الاعتذار حتي وانا مش غلطانه وبيبرر ده انه بيحس البنت المطيعة .. مثال تاني .. بيقولي انتي ليه ماتجيش تسلمي علي امي في العيد بالرغم اننا لسة مخطوبين والمفروض الزيارة دي تكون منهم لبيت العروسة حسب العرف .. بيغير الي حد الشك ويلاحقني بالموبايل وممكن فية لو ما ردتش عليه في نفس لحظة الاتصال وممكن اكون انا في الحمام مثلا او بتكلم مع المعلمين ومش نافع اقطع الكلام .. موقف زي كدة بيقعد يزعقلي عليه وتقلب خناقة كبيرة ويتهمني باني مش مسؤولة ومش عاملاله اعتبار مع اني حاولت كتير افهمه الموقف مش بيديني فرصه لانه يسمعني ..اشتكيت لوالدتي من تصرفاته قالتلي اتناقش معاه بالراحة في الامور اللي مش مريحاني في طباعه لكن للاسف بلاقي الرد كالاتي ( انا بفهم اكتر منك وانا اعرف اكتر منك والمفروض انك تسمعي كلامي صح او غلط تسمعي كلامي وبس لاني بحب البنت المطيعه ) .. طبعا لما بلغت امي برده غضبت جدا وقالتلي مفيش حاجة اسمها كدة دة غير ان امي شايفاه ابن امه بشكل مبالغ فيه وعايزني انفذ كل حاجة او اقتراح امه تبلغه بيه .. الحياة بقت معاه صعبة جدا وانا تعبت من كتر المشاكل علي كل موضوع .. وكل اللي مصبرني عليه هوة اني شايلاله الجميل في بعض المواقف اللي انقذني منها وانا بحس بالامان ان فيه انسان في حياتي خصوصا بعد وفاة والدي .. ومش قادرة اخد قرار علشان الاسباب دي قوليلي يا استاذة نيفين اعمل ايه لاني في وقت وجب اخد القرار اللي يريحني باقي عمري واشكرك علي سعة صدرك .

م.ن

فضفضة
محررة الصفحة .. نيفين حجازي
حبيبتي اولا من المفترض ان احساسنا بالامان بنستمده طول الوقت من الله علشان لما يحصل اي مكروه للشخص اللي انا موقفه الامان بتاعي عليه يحصل معاه حاجة ما انهارش زي وفاة والدك كمثال ولما بخلي احساسي بالامان دايما مربوط بانسان لازم هختار انسان غلط بحكم ان احتياجي للامان ده باي شكل ولذلك بنقع في اخطاء الاختيار زي ما حصل معاكي .. مفيش منطق يقول انك تبقي مطيعة طول الوقت حتي علي الامور اللي انتي معترضة عليها .. الدنيا فيها هات وخد .. بعدين مش معني ان اي انسان ساعدني في مرة اني افضل اسيرة الفضل دة دايما لدرجة تورطني في جوازة مفيهاش توافق فكري ولا معنوي .. وموضوع انه ابن امه علي حد الوصف دي مشكلة خطيره انتي كده هتعيشي بدماغ والدته مش دماغه واصلا دماغه غريبة من الاساس .. وفكرة انه طول الوقت مصر علي انك تسمعي كلامه مفيش اي منطق في الفكرة نفسها كمبدآ ده حتي لو انتي بنته مش من المفترض اني افرض اراءي علي ابناءي علشان يطلعوا عندهم شخصية .. احنا دورنا بنوضح الصح من الغلط والاختيار ليهم .. وانا مش معاكي في استمرارك مع انسان لمجرد انه عمل معاكي معروف .. المعروف اللي عمله مممكن جدا يكون علشان برضه عايزك النسخة اللي في دماغه مش اكتر وما ينفعش انك تقرري الزواج برجل لمجرد وجود الاسباب اللي ذكرتيها وبس .. كده انتي بتتعسي نفسك .. ارجركي تراجعي نفسك في استكمال العلاقة دي لاني رايي فيها انها مفيهاش اي الفة ولا تكافؤ.