ريهام سعيد تهاجم أحمد حسن بعد صورة والدته:"مينفعش تشجعها على إنها تبقى تخينة"

بعد أن نشر لاعب النادي الأهلي والزمالك سابقًا، صورة له بجوار والدته.

وجهت الإعلامية ريهام سعيد رسالة للاعب كرة القدم ونجم منتخب مصر المعتزل أحمد حسن بعد أن انتقد تصريحاتها حول مرضى السمنة بصورة له مع والدته.

ومن خلال فيديو نشرته عبر صفحتها على Facebook، تعلن من خلاله اعتزالها العمل الإعلامي قالت ريهام "كابتن أحمد حسن مامتك زي القمر ومحدش قال إنها مش زي القمر، وواضح إنك كمان متفرجتش على الحلقة وزيطت مع الزيطة وهيصت مع الهيصة، هي زي القمر".

وأضافت "وممكن تبقى زي القمر أكتر لو خست، وهتبقى صحتها أحسن ومينفعش تشجعها على إنها تبقى تخينة علشان الكوليسترول والضغط ورجلها اللي مش هتقدر تمشي عليها لو هي فعلا قادرة تمشي دلوقتي".

واختتمت ريهام "هي أكيد متضايقة إنها مليانة دلوقتي، وأكيد نفسها تقيل دلوقتي، واسألها إذا كنت أنا كدابة!، وهو ده اللي كنت عايزة أغيره إنكم تقولوا للتخان أنتوا زي القمر وأنتوا حلوين، كده لأ هتموتوهم حرام عليكم".