أيمن بهجت قمر يروي قصة نجاحه ونجوم الفن يثنون عليه

الفجر الفني

أيمن بهجت قمر
أيمن بهجت قمر


روى الشاعر والسيناريست أيمن بهجت قصة نجاحه التي بدأها منذ السادسة عشر من عمره بعد وفاة والده الكاتب بهجت قمر دون أن يترك له المال الذي يعينه على الحياة، فاتجه للعمل بنفسه حتى يكسب قوت يومه الذي بدأه ب٨٠ مقابل الأغنية.



وكتب "قمر" عبر حسابه الرسمي بموقع التواصل الاجتماعي "فيسبوك": "كان عايش في طفولته ملك وفجأه بقى يتيم وهو عنده ١٥ سنه وابوه ما سابلوش فلوس .. ساب بيته وعاش في بيت مش بيته وراح بعدها في بيت أمه وبعدها رجع عاش لوحده وكان مش لاقي ياكل .. اشتغل وهو عنده ١٦ سنه عشان يلاقي ١٠ جنيه ..ايوه عشره جنيه كانت امله بالنسباله وكان ممكن من الجوع ياكل بصل مثلا وماكانش حواليه الا اصحابه ..تعب وطلع عين امه وأخدها واحده واحده من ٨٠ جنيه في الاغنيه لميه وخمسين ل٣٠٠ في الاعلان ل٦٠٠ جنيه وده كان في حد ذاته انجاز ..مالقاش حد ياخد بإيده الا قليلين وشال الهم والمسؤوليه بدري اوي ويوم فوق ويوم تحت ..تقدر تقوللي بعد التعب ده كله مش المفروض الواحد يرتاح ؟ لا ..لسه برضه بيشقى عشان الإلتزامات الكتييييير اللي في رقبته 
مافيش راحه وشقيان وبيحاول ينجح ويحافظ على عيلته وعلى نجاحه لإنه ماحيلتوش الا دماغه ..تقدر تقوللي مين ده ؟؟ بعد ما تعرفه قول لنفسك : خليك في حالك ".



وأثنت الفنانة نشوى مصطفى عليه، حيث علقت على تدوينته: "اقول لك انا مين ده — ده واد جدع ورجولة على حق — كان ممكن الظروف دى تخليه ينحرف وينجرف ويكتئب ويضيع — لكن ربك كريم والواد القمر ده بقى ايمن بهجت قمر من اهم الشعرا والكتاب اللي حواديتهم فى الاغانى والدراما بترشق فى الوجدان — والظروف اللي اتحط فيها دى كانت منجم المشاعر اللي مش حيخلص ابداً بأذن الله — ربنا كريم".



وأكد منظم الحفلات والمنتج وليد منصور على حديث قمر، حيث علق: "كلنا هذا الراجل يا ايمن علشان كده ربنا بيكرمك ديما كده قد المسوليه".



بدوره، علق الكابتن مجدي عبدالغني على منشور قمر، حيث كتب: "متنساش ان ابوك سبلك اسم له وزنه وثقله وانت كملت المشوار انا بحبك فى الله لانى كنت بحب أبوك".



كما أعاد الفنان والكاتب عمرو محمود ياسين نشر تدوينة قمر، وكتب: "وانا شاهد . ايمن قمر نموذج لكفاح انسان بدا يواجه صعوبات الحياه في سن مبكرة لدرجة اني فعلا بفرح قوي مع كل نجاح لايمن لاني شفت جزء من معاناته و الصعوبات والتحديات اللي واجهها.. وبعد كده يجي مثلا شخص لا يعرف اي شيء او يفهم اي حاجه و ييجي يقيم و يقول رأيه في مين يشتغل مع مين و ده كويس ولا وحش. ... بصراحه بتبقى حاجه تنقط واللي ميعرفش يقول عدس".