أبرزهم "الوصولي" و"الثرثار".. شخصيات احذر التعامل معهم في العمل
هناك أشخاص يصفهم البعض بالشخصيات الصعبة ويعتبر العمل معهم تحدي وفي غاية التعب، ومن الشخصيات الصعبة التي تتعرض لها داخل مكان عملك ما يلي:-
1- الغاضبين بشكل دائم:
"بيتعاملو مع أي ضغط في الشغل بنرفزه، وأوقات صوتهم بيعلى على اللي بيتكلم معاهم، ودول لازم تعملهم حدود في التعامل، وتوضح أن الأسلوب ده غير مقبول، ومحاولة إنهاء الموقف حتى لو هتكمل الكلام في وقت تاني، وطبعا لو انت مديرهم لازم تنبههم أن تكرار الموضوع ده هيأثر على تقيمهم ولو انت زميل لازم تشرح لهم أن ده هيأثر على روح الفريق".
2- النرجسيين:
"شايفين نفسهم دايما صح وبيسعوا أنهم يحصلوا على اهتمام الناس اللي حواليهم وأنهم مركز الكلام والاهتمام، ودول لازم توصلهم أنهم جزء من فريق العمل وأن نجاحهم من نجاح مكان العمل، لما ننقد تصرفاتهم نكون حريصين أنه يبقى على الموقف مش على أشخاصهم عشان نتجنب الصدام وفعلا النقد يبقى إيجابي".
3- السلبيين بشكل مستمر:
"مضايقين من جواهم ودايما شايفين الجانب السلبي في كل موقف، ودول لازم تتعامل معاهم بوضوح بحيث أن كلامك ميتفهمش غلط، ولما يذكروا السلبيات في موقف معين تحاول تذكر إيجابياته، وكمان تحاول تفهم إيه سر غضبهم وبالتالي استخدامه في تحسين الشغل".
4- الوصوليين:
"الأشخاص اللي عايزين يوصلوا بأي شكل وبأي طريقة للحاجة اللي هما عايزينها اللي ممكن تكون ترقية أو منصب، ودول لازم تاخد بالك منهم لأنهم في طريقهم ده ممكن يضروك أو يطلعوا على كتفك ويستغلوا شغلك، حاول تتجنبهم ولو هما معاك في فريق العمل حاول ولا تشارك معاهم كل الشغل أو أفكارك عن العمل".
5- كثير الكلام أو الثرثار:
"بيحبوا يتكلموا في كل الموضوعات سواء فاهمين فيها أو لأ، والاسوأ أنهم بيتكلموا عن كل الناس مع كل الناس، فبيخلقوا حواليهم بيئة عمل سيئة جدا، ودول لازم نتعامل معاهم بحرص، ولا تشارك معاهم في النميمة وتوضح لهم أن ده غير صحيح وأنه مضر ببيئة العمل".
