إسلام عادل يكشف أزمته مع الاتحاد السكندري

قام إسلام عادل كانو لاعب الاتحاد السكندري على صفحته الشخصية بموقع التواصل الاجتماعي فيسبوك بشرح مشكلته مع ناديه بعد الحصول على الاستغناء الخاص به مع التوقيع على إيصال أمانة وفشل انضمامه لنجوم المستقبل.

حيث نشر على صفحته الشخصية ما يلي:

"اولا كده الحمد لله دائما وأبدا والحمد لله علي كل حاجه

ثانيا بقي الموضوع بدء ان انا كنت بلعب في نادي كوكاكولا في الممتاز ب عدت السنه وكانت سنه خير وانتهت بانضمامي لنادي كبير وهو الاتحاد السكندري وكانت حاجه بالنسبالي كبيره وكانت من الحاجات الي حمدت ربنا عليها كتير جدا وكنت فاكر ان هي هتكون بدايتي في الكوره و المشوار الي بحلم بيه مش للأسف نهايتي الي حصل بقي كالتالي القيمة الي تم الاتفاق عليها في الصفقه كانت مليون جنيه تم دفع ٨٠٠ الف كاش و ال٢٠٠ هيبقو علي سنتين

انا بقول الكلام ده عشان مهم في الي جاي

ابتديت السنه ومضيت علي العقد و اتفقت علي ٣ سنين بعد فتره اتضح ان العقد ٤ سنين ممكن تكون سازجه مني و من الوكيل الي كان معايا بس برده ده عدم صراحه من الشخص الي كنت بتعاقد معاه وعدم أمانه مش مهم ٣ زي ٤ و انا الكسبان انا في نادي الاتحاد برده بعد كده تيجي عمليه السمسرة وهي ان يتأكل من عقدي ٥٠الف جنيه وانا امضي عليهم مٌجبر عشان الدنيا تمشي وفلوسي تطلع لأني قعدت اكتر من شهر مابخودش فلوس وكنت فاهم ان الفلوس دي عموله طالعه من النادي للوكيل بس لازم انا الي امضي عليها قولت مش مهم و في الاول و الاخر رزق الراجل متوقفوش يتضح بعد كده ان الفلوس دي من عقدي أصلاوعرفت ده وانا يستلم دفعه من الدفعات وفِي شخص في النادي مقسم معاه عدي كل ده تمام والي حصل حصل نروح بقي للأهم كل الي فات حاجه والي جاي حاجه تانيه خالص بقي بدأت السنه وعديت بحلوها ومرها وكانت من اهم السنين الي عديت علّيا في الكوره استفدت كتير اوي منها المهم حصل بيني و بين مسؤل في الفريق مكالمه كابتن انا موجود السنه الجديده ان شاءالله اه يا كأنو موجود تمام شكرًا يا كابتن بعد يومين جالي تليفون من نفس المسؤل كأنو النادي عايز يطلعك أعاره ردي كان مافيش مشكله يا كابتن بس فين الاعارة دي هنظبط ونرد عليك وانت برده شوف تمام يا كابتن المهم كنّا في تواصل لفتره وينتابع بعض بالاخبار انا والمسؤل انا من الاتجاه الي كنت ماشي فيه ماكنش في نادي في الممتاز ولا الممتاز ب عايزني أعاره لسبب أني لاعيب سني صغير وممكن لو جالي اَي عرض ممكن اكسب النادي وكده حق اَي نادي يفكر كده المهم المسؤل كلمني قالي في نادي عايزك وهنسيبك نهائي للنادي ده قولتله تمام يا كابتن هو نادي ممتاز ب وكان في الممتاز السنه الي فاتت طيب يا كابتن طالما في نيه ان كأنو يمشي سيبني اشوف حالي ابتديت بقي احس ان أصلا النادي مش عايزين يسيبوني عشان ملعبش دوري ممتاز ليه انا معرفش المهم دلوقتي الكلام خلص لحد هنا علي انك لو هتروح النادي الممتاز ب الي احنا عايزينه هتمشي خالص و ببلاش اَي حاجه تانيه لا هو كل ده طبعا عادي وبيحصل في اَي مكان في العالم عشان في مصلحة مشتركه بين الناديين مافيش مشكله بس ماتجيش علي اكل عيشي ومستقبلي عشان خاطر مصالح تانيه

المهم بقي في ظل الصراعات دي وطبعا كل يوم بتصل بالمسؤولين بفريق الكوره بتاع ٥٠ مره في الْيَوْمَ تواصلت مع مسؤول اكبر وكان في منتهي القبول ربنا يباركله بس طبعا الناس الي حواليه لا وميمشيش ومش عارف ايه والكلام ده ويظهر بقي معادن الناس المهم بعد تعب حوالي ١٠ ايّام في تواصل وفِي خلال الفترة دي بقي جالي مكالمه من المسؤول الاول قالي انت مالكش تمرين ولافلوس قولت طيب أتمرن قالي لا المهم تواصلنا لاتفاق الي هو هنعمل عقد بيني وبين النادي ينص علي ان هاخد الاستغناء ولو روحت نادي دوري ممتاز اجيب ٥٠٠ الف ولو لاعبت ممتاز ب ١٥٠ الف وهمضي إقرار أني مشيت برغبتي قولت تمام ووافقت في حين أني مش ماسك حاجه في أيدي ولا اعرف أصلا الانديه ممكن تدفعلي عقد اقدر أسد بيه ولا لا عشان طبعا انا ملعبتش ومحدش عارفني غير بالسمع بقي وده كان صعب شويه المهم روحت النادي مضيت وبصمت وتمام وانا يستلم الاستغناء قالولي في شخص مسؤول مش موجود وهو الي معاه الختم الكلام ده في رمضان في الصيام المهم المسؤول هيكون موجود امتي يا جماعه بعد يومين طيب حاضر بعد يومين روحت النادي الورق نزل للمسؤول يتمضي ويتختم ف طبعا هيطلع حاجه جديده طلعت الحاجه الجديده وهي ان لا ثواني ياكانو انت مش هينفع تاخد الاستغناء عشان العقودبتاعتك فيها فلوس ولازم تتراجع ونفهم احنا الدنيا ماشيه ازاي حسّيت للحظه ان كأنو يمشي بقيت حاجه ضخمه اوي مع أني محدش يعرفني أصلا المهم أجي امتي تاني يا كابتن تعالي بكره هتاخد الاستغناءقولت حاضر روحت تالت مره لاقيت كلام تاني خالص رجعنا تاني لموضوع الاعارة والنادي الي هما عايزينه يرده المهم بعد نقاش طويل لمده ٣ساعات مشيت برده وفِي انتظار ميعاد تاني كل ده في ظل ان ف وقت بيفوت والفرق كلها بدءت وانا كل يوم بيعدي عليا انا الي خسران المهم قالولي تعالي ٤يوم العيد روحت طلع اتجاه جديد خالص بقي معلش يا كانو هتمضي علي العقود هي هي بتاعت ٥٠٠ الف وال ١٥٠ بس كان فيهم اخطاء إملائيه بس ومعلش معاهم إيصال امانه صغير ب ١٥٠ الف معلش قولت حاضر ومضيت ونزلت اختم الاستغناء المسؤول قالي لا إيصال امانه ايه مافيش لاعيب كورة في نادي الاتحاد يمضي إيصال أمانة قولت طيب ياكابتن اناراضي قالي لا اصبر وانا هحل الموضوع طبعا مشيت ورجعت بعد يومين لاقيت كلام تاني طبعا عشان كان الوقت خلاص وانا شبهه بطلت قالولي هات ٢٠٠ الف جنيه وخد الاستغناء وده كلام نهائي المهم بقي هجيب منين ٢٠٠ الف المهم ربنا كرم بنادي لسه صاعد ممتاز بس مبيشتريش لاعيبه المهم اتفقت معاهم أني هدفع الفلوس من العقد مع ان العقد مش واو بس عايز الحق نفسي. المهم دفعت الفلوس والاستغناء خدت وقت عشان تطلع النادي التاني بقي في الكام يوم دول ماتفقناش وباظت الدنيا يافرحتي انابقي معايا استغناء وعليا ٢٠٠ الف الي اخدت بيهم الاستغناء عشان اكيد مش انا الي دافعهم ده وكيل ومافيش نادي ويارب الحق حاجه في الممتاز ب حتي

اخيراً أسف علي الاطاله بس دي معاناتي في الشهرين الي فاتهٌ بختصار

#حسبي_الله_ونعم_الوكيل

عايز بس أقول للمسؤولين في نادي الاتحاد هو انا لو ابنك او اخوك هترضالي الي حصل ده؟

اتحاد كورة فاشل عشان يدي كل الحقوق للانديه ويهين اللعيبه عشان أم قايمه خره الانتظار دي هي السبب في كل ده.

الحمد لله دائما وأبدا.. ربنا اسمه العدل".