كلمة السيسي في احتفالية تكريم الأمهات المثاليات
شهد الرئيس عبد الفتاح السيسي تكريم الأمهات المثاليات والذى أقيم بفندق الماسة، ومنحهن وسام الكمال للأمهات المثاليات على مستوى الجمهورية، بحضور عدد من كبار رجال الدولة، كما حضر الحفل قرينة الرئيس انتصار عامر.
وقدم السيسي التحية لأوركسترا النور والأمل للمكفوفات، بعد عرضه الموسيقى الرائع فى حفل تكريم المرأة المصرية والأم المثالية، المقام الآن فى فندق الماسة، موجها الشكر والتقدير والاحترام لأعضاء الفرقة وقائدها.
وخاطب الرئيس السيسي عضوات أوركسترا النور والأمل للمكفوفات، فى حفل تكريم المرأة المصرية، قائلا: "انتوا تقعدوا وإحنا نقف، انتوا بتدّونا دفعة هائلة من الرضا والبهجة والسعادة، وأوجه لكم كل التحية والاعتزاز".
وقال الرئيس: "إحنا اتشرفنا بيكم النهارده، وسعدنا بيكم، انتم حاجة جميلة جدا، وهذه رسالة لنا كلنا إن مصر تستطيع، وتحيا مصر بكم".
والتقط الرئيس عبد الفتاح السيسي صورة تذكارية مع الأمهات المثاليات، قبل انطلاق الحفل المقام بفندق الماسة.
وقال الرئيس عبد الفتاح السيسي، إن المصريين تحملوا ظروفا حياتية صعبة من أجل الحفاظ على البلد"، متابعا: "ربنا حافظ على البلد دى لأجل القلوب الطيبة، قلوب المصريين".
وأوضح السيسي، فى كلمته باحتفالية تكريم المرأة المصرية والأم المثالية، المنعقدة الآن بفندق الماسة، أن الإجراءات الاقتصادية الصعبة التى اتخذتها الدولة كانت حتمية ولا خيار فيها، مضيفا: "محدش أبدا هيبقى عايز يؤلم أهله أو يقسو عليهم أو يعرضهم لظروف صعبة، إلا اذا كان مُكره أو هدفه ما يخليش وطنه بشكل لا يرضيهم".
ووجه الرئيس عبد الفتاح السيسي حديثه للمرأة المصرية بالقول: "أنتم سيدات مصر والشابات، وقفتم جنب مصر، وأنا لسه محتاجكم علشان المشوار لسه ما خلصش، ومصرين إن بلدنا تاخد مكانها اللى يليق بيها وسط الأمم".
وطالب الرئيس، الحضور بالوقوف تحية وتقدير لكل سيدة مصرية، واللواتى أسماهن "عظيمات مصر".
وقال السيسي: "كلامى عن الست المصرية لا ينتهي، وده مش مجاملة ليهم، وخلال الـ5 سنوات اللى فاتوا محدش هيجامل بدم أولاده أو أزواجه، وخلال الفترة دى التقيت أسر الشهداء، وأقسم بالله لم أسمع كلمة واحدة من أم أو زوجة شهيد فيها أى شكل من أشكال الملامة".
وتابع: "مفيش سيدة قالت كلمة تعترض فيها أبدا على إنها فقدت شهيد للأبد، اللى هو السند، يمكن الابن والحبيب، لكن هى كانت دايما شايفة مصر".
وأضاف السيسي، فى كلمته باحتفالية المرأة المصرية 2018 والأم المثالية، قائلا: "الست تبتلع ألمها وأحزانها علشان خاطر بلدها، دى تجربتى، بقول للمصريين من فضلكم اتحملوا وقدروا وتأدبوا مع كل ست وبنت، ده مش تفضّل، ده تقدير وعرفان مننا، لأن ليهم حق كبير عندنا".
وتابع الرئيس، موجها رسالة لسيدات مصر بالقول: "خلال السبع سنين اللى فاتوا، انتوا أكتر من دفع وتألم من ظروف مصر، الأمور الأمنية ما كانتش مستقرة، أكتر ناس دفعوا التمن هم سيدات مصر، عظيمات مصر".
وطالب الرئيس السيسي، سيدات مصر بالمشاركة فى الانتخابات الرئاسية والنزول للجان التصويت، متابعا: "محتاج كل سيدة وأم وأخت، من فضلك، محتاج الدنيا كلها تشوفنا فى الشارع، قولوا ما شئتم، المهم المصريين ينزلوا".
وأضاف السيسي قائلا: "من فضلكم دى نقطة مهمة قوي، فيه ناس كتيرة بتاكل كتاف مصر، ده ما يقفش قدامه إلا شعب مصر، مش أنا ولا الجيش ولا الشرطة، لازم الناس كلها تنزل الانتخابات، حتى لو قالوا لأ، لو نزل شعب مصر وقالوا لأ ده أمر عظيم ومحترم ويُنفذ فورًا، اسمعوا منى بس".
وتابع الرئيس السيسي كلمته بالقول: "عايز أقول حاجة، إحنا عايزين ندّى المثل ونأكّد للعالم كله إن البلد دى بيحكمها شعبها مش حد تانى، ويبقى يحكمها الشعب إزاى، بإنه ينزل يقول إحنا حاضرين وموجودين، ولو مش عايزين مش هيقعد فى مكانه ثانية، أنا محتاجكم، شجعوا أبنائكم وأزواجكم للنزول للانتخابات".
وردا على سيدة هتفت داعية الله أن يمنحه العمر الطويل، وأن يأخذ من عمرها ليعطيه، قال الرئيس عبد الفتاح السيسي: "لما نطلب من ربنا، ربنا غنى، مش لازم ياخد من عمر حد تانى، ربنا يديكى العمر والصحة".
