مني البرنس في أولي جلساتها: "فيلم البوستات معمول عشان الجامعة تخلص مني للأبد"
اتهمت الدكتورة منى البرنس، أستاذة الإنجليزي بكلية الآداب بجامعة السويس، في أولي جلساتها، الجامعة بتشكيل فريق عمل للعمل ضدها.
وكتبت "البرنس"، في منشور علي مواقع التواصل الاجتماعي "فيسبوك"، اليوم الإثنين: "أمام قاعة مجلس التأديب، الجلسة الأولي، من وجهة نظري الفيلم ده كله معمول عشان الجامعة تخلص مني للأبد، وبعد الاطلاع علي الملف، ملف ضخم جدا، هالني، هالني والله، شهادات طلبة معظمهم ساقط اني ما بشتغلش وما بشرحش ولبسي قصير وما اصلحش ابقي استاذة... مش مشكلة الطلبة أوي في الحقيقة لأنهم صغيرين في السن، وما يعرفوش يعني ايه تعليم ويعني ايه طرق تدريس، حسب استمارات التقييم أنا مدرسة فاشلة".
وأضافت: "والحقيقة أنا معرفش الاستمارات دي اتعملت لكل الاساتذة والا انا بس، ما هالني تاني، وهالني بجد ان في ٢٢١ صفحة وسي دي لبوستاتي اللي بكتبها علي الفيس بوك في الملف ودة راح للنيابة العامة عشان تحقق معايا في اي حاجة تدينني جنائيا".
وواصلت: "أنا مش قادرة أصدق أن الجامعة عملت فريق عمل قعد يذاكر صفحتي وياخد منها بوستات وصور وفيديوهات "مشينة" عشان تستخدم ضدي، مش مشكلة حرية التعبير دلوقتي، بس صعبان عليا الوقت اللي بعض الزملاء ضيعوه في ال ٢٢١ صفحة ونقلهم علي سي دي".
وأضافت: "و بعدين بقول ماهو لو بيعملوا حاجة مفيدة كان بان لهم أي انجازات أدبية أو مؤلفات علمية، أنما هما الحقيقة زي زميلي اللي طلع في العاشرة مساء جايب شوية بوستات منقيهم وبيقول لي ازاي تقولي كدة، متهيألي لو كنتوا ترجمتوا كتاب او ألفتوا كتاب علمي، مش قص ولزق، من اللي بيتباع للطلبة ويترمي علي الارض بعد الامتحان، متهيألي دة كان هيبقي أفيد، مش مستغربة علي كل حال، الحمد لله انا ما بضيعش وقتي وانجازاتي الادبية تأليف وترجمة تشهد لي، وأنا طالعة مولد سيدي أبو الحسن الشاذلي بكرة بإذن الله، وهدعي على كل واحد وواحدة أذوني في الجامعة دي، قديم وجديد، وماعنديش أي شك إن ربنا هينصرني ويجيب لي حقي م كل اللي أذوني".
