حوار تخيلي.. كوبر وجهاز المنتخب قبل إعلان قائمة مباراة تونس

أعلن الأرجنتيني هيكتور كوبر المدير الفني لمنتخب مصر الأول، قائمة اللاعبين المحليين قبل معسكر الفريق إستعدادا لمباراة تونس.

 

وفي هذا التقرير التخيلي يستعرض "الفجر الرياضي" حوار من وحي الخيال دار بين هيكتور كوبر وجهازه الفني وذلك أثناء اختيار قائمة المنتخب قبل لقاء تونس.

 

حدد هيكتور كوبر موعد مع جهازه الفني لعقد اجتماعاً هاماً ، وذلك لتحديد اسماء اللاعبين المقرر انضمامهم للمنتخب ، وبالفعل حضر أسامة نبيه وأحمد ناجي ومحمود فايز حسب الموعد المحدد.

 

ودار الحوار التالي بينهم:

 

كوبر: يا كابتن ناجي أنا قررت إني أضم الحضري والشناوي وإكرامي

 

ناجي: عين العقل يا خواجة دول أفضل الموجودين

 

كوبر: الدفاع بقى يارجالة هيبقى ربيعة وسعد وجبر وحجازي

 

محمود فايز: ربيعة مين ياكوتش انت شوفت ماتش الأهلي كويس امبارح ولا الفتة لسة عامله شغل معاك

 

أسامة نبيه مقاطعا : يا كوتش حجازي كمان مصاب وفي أكتر من مدافع ممكن نشوفهم غيره

 

كوبر: خلاص يا حبيبي انت وهو.. الدفاع خلاص نخش على وسط الملعب، أنا هجيب حسام عاشور وعبدالله السعيد ومصطفى فتحي والشيخ وكهربا وطارق حامد

 

أحمد ناجي: يااااااااه عشت وشوفت حسام عاشور بيلعب في المنتخب

 

محمود فايز: بس يا مستر كوبر احنا كدة واخدين كل اللاعبين من الأهلي والزمالك ومفيش ولا لاعب من أي نادي تاني غير الحضري

 

كوبر: مفيش مشكلة، مش مهم اللاعيبه بتاعة المصري ودجلة وسموحة والمقاصة المهم الأهلي والزمالك، قصدي المهم مصلحة منتخب مصر

 

الصمت يسود الإجتماع لمدة 30 ثانية، وفجأة يعود كوبر للحديث قائلاً: محضرلكم مفاجأة حلوة خالص بخصوص خط الهجوم

 

الجميع: أيييييييييييييه

 

كوبر: أنا هضم مهاجم واحد بس من الدوري

 

أسامة نبيه: مين يا مستر ؟ أكيد باسم مرسي

 

كوبر: لا مش باسم ، أنا هضم عمرو جمال

 

أسامة نبيه: أزاي يا مستر هيكتور دة أحنا صرحنا في كل وسائل الإعلام إنه هيرجع المنتخب المعسكر اللي جاي

 

كوبر: لالالالا ، الولد باسم دة مش متابع ، خلينا مع عمرو، عمرو جمال حلو وبيتابع

 

جميع أفراد الجهاز يلتفتون لبعضهم وعلامات التعجب تتسيد الموقف، ليعود كوبر من جديد يتحدث قائلاً: يلا يلا الاجتماع خلص ، أسامة أدي الاسماء لإيهاب لهيطة عشان يقول للإعلام ، اتفضلوا امشوا يلا وانت يا فايز استنى عايزك

 

يخرج الجميع من الاجتماع ويبقى مع كوبر محلل الأداء محمود فايز

 

كوبر: محمود ايه رأيك في القايمة

 

فايز: حلوة يا مستر

 

كوبر: طيب يا حبيبي أنا عايز أروح آكل فتة تاني النهاردة يا محمود

 

محمود فايز: هههههههههه من عيني يا خواجة إنت تؤمرني .