رقص المهرجانات وصداقة الرجال.. 10 تصرفات تفقد المرأة أنوثتها (تعرف عليهم)

تواصلنا مع عدد من السيدات ووجهنا إليهن سؤال "أسباب فقدان المرأة لأنوثتها" ليجيبن على السؤال بمجموعة من الأفعال والمواقف هي السر وراء ضياع أنوثة البنت، جمعناها لكم خلال السطور التالية.

أشارت هبة الفيشاوي، إلى أن كل أفعال الرجال إذا فعلتها النساء تفقدها أنوثتها، فقالت: "ليس الذكر كالأنثى ..يعنى اللي أي بنت بتكرهه فى الرجالة يبقى هيفقدها أنوثتها، زي الصوت العالى، والعصبية، البنت لما بتتعصب ونبرة صوتها تعلى بتبقى شبه الولد وأنوثتها بتضيع". 

وقالت نهى اسماعيل، أن أغرب الامور التي تفقد المرأة أنوثتها هي رقص المهرجانات، متابعة: " كله كوم ورقص المهرجانات ده مصيبة لوحدها شكل البنات اللي بترقص كده مقرف لا يمكن يكونوا بنات، الرقص هو زي سامية جمال كده وفيفي عبده في أنوثة ورقة مش الترزيع والتخبيط ده".

وأوضحت إسراء محمد، أن السر وراء فقد البنت أنوثتها، هي مصادقة الرجال، مشيرة أن مصادقة المرأة الرجل يفقدها طريقتها وجاذبيتها وأنوثتها، فقالت: "القعدة مع الشباب  كتير وصحوبيتهم  بتخلى الهادية الرقيقة تتغير مع الوقت وتاخد من طبعهم".

ورأت أم ياسين، أن الزواج والإنجاب سبب فقد المرأة أنوثتها، فقالت: "الجواز  والخلفة سبب ضياع أنوثتي، كنت بسكوته فى بيت اهلى بعد الجواز والمسؤليه أخشنيت كده عشان تعدى الازمات، بقيت راجل فى الشارع عشان جوزي ميحبسنيش فى البيت، ده غير الزعيق فى العيال، الأكل بزعيق واللبس بزعيق والحمام بزعيق والنوم بزعيق والخناق مع الراجل بزعيق خالص مافيش  انوثه خلاص".

ونوّهت جنا يوسف، أن التشبه بالرجال في اللبس، والحياء هم سبب فقدانها أنوثتها، فقالت: "الحياء والالفاظ اللى مش فاهمه بتخرج ازاى اصلا من بعض البنات هما سبب فقدانها أنوثتها، ده غير لبسها البنت بقيت شبه الولد بتلبس زيه بناطيل وقمصان، إنما البنوته اللي بتلبس لبس بنات بتبقى أنثى كده في نفسها، عاوزة تبقي أنثى ألبسي فستان وكعب عالي ومتردديش الألفاظ الغريبة اللي بتتقال اليومين دول وأنتي تبقي تمام".

وأضافت سلمى عبد الحفيظ، أن غياب الثقافة سبب أساسي في ضياع انوثتها،فقالت: "اللي بيضيع انوثة البنت انها تبقى تافهه و غير مثقفه، الثقافة بتفرق لأن البنت غير المثقفة بتتعامل بهبل وبتبوظ شكلها وشكل البنات معاها".

ولفتت مي محمد، أن شرب السجائر والشيشة سبب رئيسي في فقد المرأة انوثتها، وقالت: "البنت لما بتكون ماسكة السجائر أو الشيشة كده جزء من أنوثتها بيروح، ده غير أن صوتها بيخشن وسنانها بتصفر وبتكون ريحتها وحشة وكلها سجاير فهنا الأنوثة بتنهار مش بتضيع".

ورأت جودي محمد، أن قلة الدلع هي سبب فقدان البنت انوثتها،فقالت: ""لو مكنتيش مايصة يبقى انتي مش أنثى، والمياصة بتيجي من الدلع فلو ملكيش حد يدلعك هتفقدي جزء كبير من انوثتك، علشان كده اتجوزي اللي يدلعك مش اللي يخنقك وانتي تحافظي على أنوثتك".

ورات أسماء الخولي، أن التحرش هو سبب فقد المرأة انوثتها، فقالت: "علشان احنا مصريين دا في حد ذاته بيضيع انوثتي والله. 

لما ابقا عايشة في دولة تحتم عليا اكون الراجل والست في نفس الوقت يبقا محدش يقول البنت المسترجلة، علشان أنا في بعض الأوقات لو مكشمتش واتخليت عن انوثتي وعملت فيها راجل اقسم بالله كان زماني أنثى البعير بيتحرشوا بيا في شوارع المدينة،فبعض الظروف تحتم على البنت تقلب الشخصية وتبقى راجل طالما بتعامل مع حيوانات متحرشين".

وأوضحت سارة محمد، أن والدة الزوج (الحمى) والمشاكل هي أكثر الأمور التي تفقد المرأة أنوثتها، فقالت: "الست طول ما هي قاعدة عند حماتها هتعمل  مشاكل وهتفكر فيها فهتهمل في نفسها وصحتها وده بيأثر كتير على أنوثتها، يعني مثلاً أنا لو واحدة قاعدة مع حماتها هتحول لكائن نكدي مش بفكر خالص أني اكون أنثى أو اهتم بنفسي، بقلب راجل علشان اخطط وادبر ازاي اتعامل معاها وخصوصا لو هي مش بتحبني"