في حوار خاص لـ"الفجر".. أكرم توفيق: عصبية غالي "غيرة" على الأهلي ومنتظر فرصة حقيقية لإثبات نفسي
البدري أفضل مدرب في مصر ومش مجاملة
رمضان صبحي أفضل لاعب ويمتلك مقومات كبيرة
أتمنى أن ألعب بجوار أحمد توفيق في الأهلي
المنافسة مع كبار الأهلي صعبة وأحتاج لفرصة حقيقية
حسام عاشور "مسمار" وعصبية "غالي" غيرة على الأهلي
جاء إلى الأهلي من أجل معانقة المجد، والظهور بشكل مميز، وتكملة سلسلة الجيل الذهبي لنجوم خط وسط القلعة الحمراء على مر التاريخ، إنه أكرم توفيق لاعب إنبي السابق، ومتتخب الشباب.
توفيق يفتح قلبه لـ"الفجر الرياضي" في حوار مميز على النحو التالي:
في البداية كيف ترى المنافسة في مكانك منذ الإنضمام للأهلي؟
المنافسة صعبة بالتأكيد فقد تعاقد معي الأهلي وهو يضم أفضل لاعبين في مصر، وخاصة في مكاني نجوم أمثال حسام غالي، وحسام عاشور، وعمرو السولية، وأحمد فتحي، لكن "اللى" نفسه طويل هو "اللى هيكمل"، بتعلم منهم كثير جدًا، وأنا عندي ثقة في الله وثقة نفسي.
هل أجواء الأهلي تجعلك تُهيب الموقف؟
أنا مش هايب الموقف أنا انضممت لنادي كبير، ومن قبل كنت ألعب في إنبي واعتدت على هذه الأجواء ، النادي الأهلي جمهور وكيان من الصعب أن يوجد زيه ولكن طول ما أنا عندي ثقة في ربنا وفي نفسي هوصل للي أنا عاوزه، أنا راض عن نفسي في التدريبات والمباريات الودية، وأنتظر الفرصة التي لو حصلت عليها لن أفرط فيها.
ماذا يمثل لك حسام غالي؟
حسام غالي "على دماغي" وله احترامه، لاعب كبير جدًا، خارج الملعب "بقوله" يا كابتن غالي، ولكن داخل الملعب كلنا زملاء في النادي لا يوجد فارق بينا، "وبشوف تعصبه غيرة على الفريق".
وماذا عن عاشور وعن تشبيه الجميع أنك خليفته في الملاعب؟
المسمار وقتنا كله هزار أنا وهو"، ولي الشرف أن الناس تشبهني به، وعندي ثقة في نفسي أن أتفوق عليه، ومتأكد أنني لو شاركت لمدة سنة بصفة مستمرة سأنضم للمنتخب وسأحترف.
هل يضايقك عدم المشاركة بشكل أساسي؟
"أنا مش هقولك مش متضايق أي لاعب كورة مش بيشارك لازم بيضايق بس مبوصلش لمرحلة أن أزعل وده يقصر علي"، مؤمن أن اللعب في الأول والأخر وقته لم يأت بعد .
وماذا عن العروض الذي تتلقاها خلال الفترة الأخيرة ؟
الحمد لله العروض "اللى" بتوصلني ده تعرف الناس كلها أن أكرم مش قليل، وبتعرف الناس أن تقيل.
حدثنا عن العروض التي وصلت إليك؟
كان عندي عرض من بازل وأنا في إنبي، وعرض من دينامو زغرب الكرواتي، وأحد العروض الفرنسية، ومازال هناك كلام مع وكيلي يحي علي وشقيقي محمد من أندية مصرية مثل إنبي ووادي دجلة، لكن أنا مش مركز مع الكلام ده حاليًا أنا مركز مع النادي، أنا بلعب في أفضل نادي في مصر الموضوع محتاج شويا تعب.
هل العروض دي بتفرحك؟
أنا بكون فرحان لما بستقبل عروض، خاصة أن طموحي الأحتراف، وقولت الكلام ده للإعلامين في بداية تعاقدي مع الأهلي.
كيف كانت بدايتك مع عالم الساحرة المستديرة؟
بدأت في المنصورة شهرين بالظبط، وروحت إنبي وأنا عندي 88 سنين، كان موجود أخويا عبدالعزيز لاعب في نفس الفريق، لم يقم بمساعدتي دخلت اختبارات ولم أوفق، لكن عند علمهم بأن شقيق عبدالعزيز قالوا نشوفه تاني، ربنا كرمني وعرفت أثبت نفسي، فضلت 10 سنين معاهم وفي سنة واحدة لعبتها مع الفريق الأول وصلني عرض من الأهلي والزمالك ومن خارج مصر، كنت بفضل الإحتراف لكن إنبي مكنوش عاوزين يفرطوا في بالساهل، فضلت الأهلي بسبب صلاة الاستخارة، وفكرت للمستقبل.
حدثنا عن دور أحمد توفيق معك؟
أحمد دئمًا بيشجعني، لأن عندما تعاقد مع الزمالك كان بيوجهه ظروف نفس الظروف، كان موجود مع حسن مصطفى وأحمد عبدالرؤوف، بيقولي أن كنت ببدأ زيك معايا ناس تقيله ولم أهيب الموقف، لازم أنت كمان تكون كدة ولما الفرصة تجيلك لازم تمسك فيها ومتطلعش من الملعب ووقتها هتكسر الدنيا، وأنا عندي ثقة ومتأكد من ده.
ماذا عن منتخب الشباب؟
من البداية وكنت عاوز أتكلم عن المنتخب، مفيش حاجة مزعلاني ولا مقصره في قد أن المنتخب ده يخرج بالشكل ده.
الناس بتحمل خروج الشباب لـ معتمد جمال كيف ترى هذا الأمر؟
أنا مش عارف الناس إللى بتهاجم كابتن معتمد ليه الراجل لم يُقصر معنا في أي شيء، كل واحد فينا كان نفسه ياخد البطولة سواء الجهاز أو اللاعبين حتى إلى مسفرش معانا، لان ده جيل خروجنا يعني دمار له، إلى بيخدمنا شويا أن في منتخب أوليمبي، في ناس بعد رجوعنا من أفريقيا مش هتلاقي مكان تلعب في دوري ممتاز.
ولكن ما هي الأسباب الذي أدت لخروج الشباب؟
الأسباب إلى مقدرناش نقاومها سوء أرضية الملعب كانت عبارة عن تراب، وأجواء حاره وقلة أوكسجين، وبالإضافة إلى الأمطار كانت تحول الملعب لـ "طينه"، والإصابات، أحمد هاني الظهير الأيسر كان يشارك بالرغم من الإصابة في الكاحل، وأنا كان كتفي مخلوع، نيدفيد كان عنده كدمة في الرباط الداخلي للركبة.
شايف الأزمات الحالية في الكرة المصرية ازاي خاصة مشكلة الزمالك مع المقاصة؟
أنا مش عاوز أدخل نفسي في الامور ده كل واحد له شغله وفي اتحاد كورة لازم يحاسب، والموضوع ميستهلش كل الضجة ده لانها غلطة زي أي غلطة.
شايف تجربة حكم الفيديو إزاي؟
هيبقى الموضوع مش كورة، كل كورة هنطلع نبص على الفيديو بره؟! طيب أي لزوم الحكم بقى من دلوقتي، نحكم لنفسنا ونلعب أحسن بقى ؟!!." أتمنى الكورة ترجع زي زمان والجماهيرلازم ترجع.
الإجابة تطرح سؤال مهم شايف أن الجمهور يفرق معاك كعامل إيجابي في سنك؟
أنا بحب أشوف الجمهور حولية، صوت الجمهور بيديني دفعة مش ممكن، في المباريات الى لعبناها بجماهير هنا أي حد كان بيقول مصر أنا لو مش قادر أجري على الكرة هيبقى عندي حماس أن مفيش حاجة توقفني عشانه مش عشاني.
شايف أيه أسباب الإصابات في الأهلي؟
أنيس الشعلالي محترم ومحترف في شغله، والإصابات بتاعت ربنا وأسبابها كثير، ممكن يكون السهر، التغذية، الحالة النفسية، مثلا لو لاعب شاف شغل في الكورة صعب هيهمد نفسه وهيتسبب في الإصابة.
هل تؤثر السوشيال ميديا على الفريق ازاي هل بتفرق معاكم؟
أنا معنديش تواصل بالسوشيال ميديا، بفصل نفسي عن الجو ده تمامًا، مش عاوز أشوف تعليق يزعلني ولا يفرحني.
من اللاعب الذي تفضل اللعب بجانبه؟
أحمد توفيق ولو قولتلي مين اللاعب إلى نفسي ينضم للأهلي والعب مع هقولك أحمد، من وأنا صغير كان بنلعب خماسي وفهمين دماغ بعض جدًا، لكن بتعلم من كل لاعبي الأهلي الكبار وعمري ما أتهز ثقتي وأنا بجانب الكابتن غالي وعاشور وفتحي والسولية.
من أفضل مدرب في مصر؟
حسام البدري وعن قناعه مش مجاملة ولا عشان العب ، أقسم بالله أفضل مدير فني في مصر.
من أفضل لاعب في مصر من وجهة نظرك؟
رمضان صبحي، عنده ثقة في نفسه وفي إمكانياته أكبر من سنه، وربنا هيكرمه بأكثر من ستوك سيتي.
