للبنات الكسولة.. الدليل الكامل للجمال

الفجر الطبي

للبنات الكسولة..
للبنات الكسولة.. الدليل الكامل لجمال


إحنا عارفين معاناتك بين إن نفسك تهتمي بنفسك وبين إنك مشغولة طول اليوم في الشغل والبيت أو الأسوأ بقى إنك تكوني أصلاً شخصية كسولة!! بس خلينا متفقين إن في عادات جمالية لو واظبتي عليها هتخلي بشرتك فيها صحة وحيوية وكمان هتفرق جداً في شكلك حتى لو نزلتي في يوم منغير ما تحطي أي مكياج، الموضوع دة لكل البنات الكسولة إللي نفسها تهتم بنفسها وببشرتها منغير ما تبذل مجهود كبير وبكدة هتوفري وقتك لحاجات تانية. 

دي نصايح سريعة هتساعدك: 

المناديل المخصصة لإزالة المكياج:
أخطر حاجة البنات الكسولة بتعملها هي النوم بالمكياج ودة غلط جدًا لأنه سبب لظهور التجاعيد والحبوب، ف لو مكسلة تغسلي وشك، ممكن تستخدمي مناديل مبللة للوجه مخصوصة بتشيلي بيها المكياج.

أسرع مرطب للجسم بيدوم مفعوله لأكتر من يوم:
لو بعد الشاور بتبقي عايزة تنامي ومش قادرة ترطبي جسمك، فيه فكرة هتخلي جسمك ناعم لأكتر من يوم، والفكرة دي متكونة من لوشن الأطفال وعليه نقطتين زيت جوز الهند، إدهني بيهم جسمك بعد الشاور وهتكتشفي إنك مش محتاجة تستخدميها غير مرتين في الأسبوع بس، لأن الوصفة دي للترطيب العميق فهتخلي جسمك ناعم لأكتر من يوم. 

خليكي في ماسكات الوش الجاهزة:
مش لازم عشان تعملي ماسك تخلطي البيض على الدقيق على السكر والليمون! لأنك ببساطة هتكسلي تكمليه وهتحرمي تكرريه تاني! عشان كدة ممكن تشتري ماسكات الوش الجاهزة إللي مش هتاخد أكتر من 10 دقايق ومش هتتعبي خالص في تحضيرها، بعد الماسك حطي على وشك مياه ورد هتحافظلك على ترطيب بشرتك. 

الشامبو السحري:
طبعاً كلنا عارفين معاناة الشاور في الشتا، دة غير بقى الكسل في الأيام العادية ! عشان كدة بننصحك تجربي الشامبو السحري إللي إسمه "الشامبو الجاف" رشتين على شعرك وهو ناشف ومش هتحتاجي تاخدي شاور مخصوص عشان تغسلي شعرك، في أنواع كتير ممكن تسألي عنها في أي صيدلية.

الشراب قبل النوم:
لو إنتي من البنات الكسولة إللي بيكسلوا يروحوا للكوافير، ممكن ببساطة قبل ما تنامي تدهني رجلك بالكريم المرطب وتلبسي شراب عشان بشرتك تمتص الكريم، و ممكن كمان كل أسبوع أو أسبوعين قبل ما تلبسي الشراب تبردي ضوافرك وتحطي مانيكير.

خطوة واحدة لمكياج أسهل:
أما بقى لو بتحبي الميكأب بس بتصحي قبل ميعاد الشغل بنص ساعة وكمان بتعتبري نفسك من البنات الكسولة، ممكن تعملي ميك أب في خطوة واحدة، إزاي؟ بالبيبي كريم لأنه واحد من المستحضرات إللي ليها إستخدامات كتيرة زي إنه كريم أساس ومرطب وواقي من الشمس، فهيوفرلك وقتك ويديكي النتيجة إللي إنتي عيزاها.