الرجالة زي طابع البوستة

فضفضة



يا استاذة نيفين انا طول عمري بقول ان الرجالة عندهم من الانانية يكفي الكون مهما الواحد يعمل مفيش فايدة يعني انا بحب خطيبي جدا اللي كان بيحفا ورايا عشان بس اقوله كلمة حلوة او ارضي عن العلاقة دي من اصله ولما اتنيلت حبيته بقي يشوف من الاهتمام ارقاه واحلاه واكبره يقوم يبدا هوة في التراجع عن البوح باي كلمة مرضية او مجاملة او حالة الود اللي كانت موجودة الاول .. هوة بيتحجج بالمشاكل اللي محاوطاه وانها مش مدياله فرصة يرجع معايا زي الاول دة اعتراف ضمني انه اتغير معايا وانا من الناس العاطفية جدا وبعيش يومي بكلمة حلوة او مجاملة في وقتها يبقي ليه البخل في المشاعر دة ؟ ليه لماالست تبدا تقرب يبدا الراجل في تقل دمه تقيل علي القلب وليه بقي عامل زي طابع البوستة كل مانتف عليه يلزق ؟ ليه الاهتمام بيتقابل بالاهمال انا هتجنن والمصيبة اني بحبه جدا مش قادرة حتي اخد قرار باني اتقل زيه كدة حاجة تقرف .. يا استاذة نيفين قوليلي الله يخليكي اعمل ايه ما انا مش هعيش علي الاطلال كدة .. ارجو الرد سريعا وشكرا

فضفضة
محررة الصفحة .. نيفين حجازي
يا صديقتي العزيزة طولي بالك شوية كل الناس بتمر بظروف وضغوط تخليها تكلم نفسها وانتي نفسك معرضة لكدة .. ساعات المشاكل بتفقد الانسان احساسه بالجمال المحيط بيه لكن دة مش معناه انه معترف انه جميل .. اصبري شوية وحطي نفسك مكانه اكيد هتلاقي رد فعلك زية .. احنا بشر والضغوط تعمل اكتر من كدة وافتكري هوة كان عامل ازاي قبل المشكلات اكيد هتلاقي فيه الانسان اللي حبيتيه بس هوة محتاج انك تشاركيه مش تقلبي الترابيزة عليه حتي علشان يشيلهالك انك وقفتي جنبه بكلمة تخفف عليه الهم اللي هوة عايشه .. ارجوكي تعملي كدة وشاركيه بدل ما تعاديه .. والموضوع مش انك تعيشي علي الاطلال ولا حاجة كل القصة انها شوية مشاكل ومسيرها تخلص زي كل حاجة ما بتخلص .. عيشي الحب حتي في الازمات .. احب مش بيفرق .. الحب مع شريك الحياة بيتحس وبيتعاش في كل الظروف .. بكلمة حنينة تجبريه علي الرد اللي نفسك فيه.