أسما شريف منير لمحمود حجازي بعد هدية عيد الحب: "سيد الرجالة"

حرصت أسما شريف منير، علي توجيه رسالة لخطيبها الفنان محمود حجازي، وذلك بعد حرصه علي شراء هدية عيد الحب بالرغم من انشغاله بالتصوير.

وكتبت اسما، خلال حسابها الرسمي بموقع التواصل الاجتماعي "فيسبوك": "اغلب الرجالة مش بيطيقوا يوم عيد الحب و بينسوه أو بيعملوا عبط او بيتريقوا علي اللي بيحتفله بيه و الحقيقة محمود حجازي زي اغلب الرجالة الْيَوْمَ ده يوم عادي بالنسباله.."بس" هو أصلاً بقاله ٣ ايّام بيصور ورا بعض يعني منمش ولا حتي روّح و كنت بكلمه بطمن عليه و بحكيله إني لقيت سماعه عظيمة لأني بموت في المزيكا و بحب اسمع صوت نضيف و بقوله انشاء الله هجبها قريب بس لما اقبض و قفلت و متأكدا انه أصلاً مكنش مركز لانه مطحون في الشغل".

وأضافت قائلة: "و فاجاة تاني يوم لاقته بيقولي إنزلي انا مستنيكي عايزه اوريكي حاجة فانزلت لاقيته مشغل أغنيتنا (لما تلاقينا-عبد الرحمن محمد) و ماسك السماعة و بيقولي عشان انا هبقي شغال في ال valentine كل سنه و إنتي طيبة..انا اول مرة حد يعملي كده في حياتي علي الأقل مش عشان يخلص و يسكتني لا عشان عارف ان ده هيبسطني، لو الرجالة فكرت موقف زي ده قد ايه بيفرق معانا كا ستات و بنشيله و بنبقي عايزين نديكوا الدنيا كلها.

انت سيد الرجالة، ربنا يخليك ليا و تفضل احلي راجل في عنيا و يبعد عنا العين و الشر و الحسد. بحبك".