نصر محروس.. "صانع النجوم اللي باع الهواء في أزايز"

إمتى نقول عليك مبدع ؟

 

نقول عليك مبدع لو شوفت حاجة محدش شايفها غيرك .. نقول عليك مبدع لو شوفت حاجة طبيعية بشكل مش طبيعي .. نقول عليك مبدع لو حاربت الدنيا كلها علشان تعمل اللى انت مقتنع به..

 

طبيعي أنك ممكن تفشل؟ تعمل حاجة وتفتكر انها هتكسر الدنيا بس متكسرهاش.. بس صدقني هتحس بقيمتك.. المشكلة أن اللي بيفكر عندنا زيه زي اللى بينفذ مفيش تقدير، مع أن في البلاد المتقدمة .. لما تيجي تختار فريق عمل بتحط اللى بيفكر على رأس القائمة وبعدين يجي الباقي.. لأن اللى بيفكر عُمله نادرة..

 

أول طريق النجاح أنك تشوف بعيونك مش بعيون الناس.. مهما كانت الحاجة تافهة في عين الناس لو بالنسبالك حاجة لها قيمة اشتغل عليها .. صدقني هتطلع انت الكسبان..

 

طلع اللي جواك .. كُلنا جوانا واحد مُبدع، رسام، خياله واسع.. كُلنا جوانا بني أدم شايفينه "متخلف" بس في الحقيقة هو "مختلف".. والأختلاف هو اساس النجاح..

 

المبدع اللي هنتكلم عنه النهاردة هو "نصر محروس" الملقب بـ"صانع النجوم" .. زمان كان فيه فنان اسمه اسماعيل يحيي محمد سرور كانت شهرته "سمير سرور" بيشتغل عازف ساكسفون من كفر نعمان مركز ميت غمر محافظة الدقهلية..

 

الملحن بليغ حمدي أتعرف عليه في شارع محمد علي وكان اول شخص قدمه على الساحة الفنية.. المهم سمير سرور عمل شوية تعديلات عَلى الساكسفون مش مجالها دلوقتي.

 

موهبة سمير سرور خلته يشارك في جميع الحان بليغ حمدى .. و عزف ورا كبار المطربين "أم كلثوم وفايزة أحمد ونجاة الصغيرة و عبد الحليم حافظ".. المفروض كانت حياته تنتهي مع انتهاء العصر الذهبي للفن المصري..

 

لحد ما ظهر نصر محروس وبدا يفكر بره الصندوق فجتله فكرة غريبة علي الوسط الغنائي وهي انه ينتج شرائط لسمير سرور .. يكون فيها هو البطل .. فريق كورال كان بيخدم على "عاشق الساكس"..

 

وفعلا عمل شوية شرائط باسم عاشق الساكس في التسعينات واشتهرت جدا لدرجة ان كل الناس في العربيات كانت مشغلاها..

 

نصر محروس قدر يستغل موهبة سمير سرور.. "نفس سمير سرور كسب نصر محروس كثير سواء شهرة او فلوس".

 

ساعتها نصر محروس راح يقابل بليغ حمدي وكان اول مرة يشوفوا .. الفنان الكبير قاله جملة لازم نحطها قدمنا على طول : "الفكرة رزق".

 

الفكرة بتصنع المجد.. لو حد عنده فكرة وموهبة وشوية توفيق من عند ربنا هيكسر الدنيا .. اتأكد انك مسيرك هتوصل.

 

أبداع نصر محروس موقفش لحد كدة فهو عنده قصة تانية بتورينا أد ايه لو الشخص شغل دماغه هينجح ..

 

الراجل ده اتعاون مع محمد فؤاد وعمل معاه 3 شرائط أشهر من بعض كامننا وحيران والحب الحقيقي.. محمد فؤاد كسر الدنيا وقرر انه يبعد عن شركة نصر محروس ساعتها المنتج المبدع اتجنن..

 

المهم نصر محروس اتقابل مع محمد فؤاد قاله انا عندي استعداد اجيب عيال واخليهم نجوم، ساعتها نصر محروس كان بيقول كدة وخلاص، كان زعلان ومقهور فقال يفك عن نفسه شوية بكلمتين.. والكلمتين دول اتقلبوا حقيقة..

 

نصر محروس جتله فكرة أنه لية فعلاً ميجبش شوية عيال ويعمل شريط بيهم؟

 

وفعلا عمل شريط كامل إسمه "فري بيبي" .. تجربة كان ممكن تفشل.. ألا أنها نجحت وكسرت الدنيا..

 

مش بس كدة اتعمل فيديو كليب لشوية اغاني من الشريط كانت أبرزها "بابا فين"..

 

مين فينا مش عارف بابا فين؟ بابا هنا؟ هنا أهو؟ أوله مين؟

 

الله عليك يا عم نصر.. عمل فلوس من الهواء.. اهو ده االلى اتقال كان بيبيع الهواء في ازايز..