الحب بهدلة فعلا

فضفضة

الحب بهدلة فعلا
الحب بهدلة فعلا



شكوتي من حبيبي .. تقدري تقولي استاذة نيفين انه حبيب عمري وسندي بموت فيه .. مش هطول عليكي كل الحكاية انه من فترة هوة واجه شوية مشاكل تقيلة شوية في شغله فلاحظت انه اصبح مقل في الكلام الحلو اللي بيقولهولي حتي مقابلاتنا قلت كتير جدا وبقت لهجته حادة معايا مش عارفة ليه ؟ .. اشمعني انا لما بكون في مشاكل برضه بفضل محتفظة بسلوكياتي معاه علشان ما يزهقش مني وعشان برضه هوة ملوش ذنب في مشاكلي .. المهم انا دلوقتي اتخانقت معاه كذا مرة من كتر عتابي ليه علي طريقته الجديدة وهوة بيقولي انه مش متغير وان كل الحكاية انه مضغوط جدا من ظروفه وطلب مني اراعي شوية الكلام دة .. بس انا كل اللي جنني اني حسيت انه بيجنبني من حياته وان مثلا ممكن يكون فيه واحدة تانية في حياته وبناء عليه انا انهارت قدامه من العياط لمجرد الاحساس دة .. ودلوقتي انا عايزة اعرف اتصرف ازاي معاه ارجوكي يا استاذة نيفين وشكرا 
عبير

فضفضة
محررة الصفحة .. نيفين حجازي
يا عبير يا حبيبتي انتي محتاجة تتصرفي مع نفسك مش معاه .. هوة رد فعله مع الضغوط طبيعي انما انتي شكوكك ملهاش اي لازمة والراجل قالك ان مفيش حاجة يبقي ليه القلق .. واضح انك بتحبيه جدا  لكن دة يخلي تحملك ليه في الازمات اكتر مش اقل .. اوعي تبوظي علاقتك معاه باللي انتي بتعمليه دة وخليكي جنبه وسنده والمستشار بتاعه في مشاكله علشان ما يحصلش نفور .. ارجوكي تسمعي نصيحتي وتطلعي كل الشكوك من دماغك لانها ملهاش اساس .. واسعدي بحياتك وحبك معاه في هدوء واعتذري له كمان علي اللي صدر منك وما يتكررش تاني ارجوكي .. بس كدة خلاص .. الدنيا سهلة عن كدة بكتير امال لو شفتي عليه حاجة بجد هتعملي فيه ايه ؟