طارق يحيى رفض الإستسلام و"عكنن" على الأهلي!

 

تعبت من حلمك؟

بتعمل مجهود مضاعف علشان تحققه .. وصلت لمرحلة بتقول لنفسك خلاص كفاية.. كفاية لحد كدة..

استسلمت!

طب ليه ؟ ليه وصلت للمرحلة دي مع أنك لسه في عز شبابك.. فاكر ان الناس كلها ضدك؟ وبتقول أن الظروف كمان ضدك؟

الاجابة عليك بسيطة ..

مين كانت الظروف معاه ؟ ولا مين اتولد في بُقه معلقة ذهب.. كل واحد من اللى انت بتشوفهم نجوم بدأوا من الصفر وصدقني من تحت الصفر كمان..

فيه مثل فرنسي مشهور بيقول "المستحيل .. مستحيل" والفيلسوف الهندي روبندرونات طاغور بيقول "سأل الممكن المستحيل أين تقيم فأجاب في أحلام العاجز" .. تحب تفضل عاجز ولا تكون طارق يحيي..

مش هنتكلم عن موهبة طارق يحيي ومدى تأثيره في صفوف الزمالك.. لأ.. إحنا هناخد موقف في حياته يستحق اننا نقف قدامه كثير اوي..

يوم 26 مايو 1985 نجم الزمالك كان عنده مباراة قمة ضد الأهلي في بطولة الدوري.. وكان الماتش مهم جدا بالنسبة للزمالك .. مش علشان ماتش قمة وكدة .. بس كان مهم لأن الأهلي كان حسم الدوري.. وجمهور الزمالك كان نفسه فريقه يعكنن على الأهلي وجمهوره..

اليوم ده طارق يحيي كان عنده امتحان في بلده في كفر الشيخ وأهله صمموا انه لازم يحضر الأمتحان.. علشان لازم ينجح خصوصًا ان الكرة مش مستقبل..

فضل يفكر.. يضيع مستقبله في الكرة؟ ولا يضيع مستقبله في الدراسة؟ ووصل لأجابة نموذجية.. هو انه لية اصلاً يختار بين ده وده .. ما أعمل الأثنين طالما عايز انجح..

تخيل انك تروح الصبح الامتحان علشان تحضره .. وبعد الظهر ترجع القاهرة علشان تلعب ضد الأهلي..

الموضوع لو فكرت فيه هتقول مستحيل يعمل كدة؟ بس هو عمل كدة لأنه شايف مستقبله في انه يحقق حلمه.. وحلمه مش هيتحقق إلا بالكرة..

بالمناسبة طارق يحيي جاب هدفه الاول في مباريات القمة في الماتش ده.. مش بس كدة صنع واحد تاني لكوارشي..

اسأل نفسك .. لية عمل ده رغم التعب.. رغم الضغوطات.. مش هتلاقي غير اجابة واحدة بس ..

الحلم