علاج الازمات بالحب

فضفضة

علاج الازمات بالحب
علاج الازمات بالحب


السلام عليكم ورحمة الله استاذة نيفين يارب تكوني بخير وسلامي لكل العاملين في باب فضفضة.. مش هطول عليكي .. انا مخطوبة لشاب ممتاز لكن هوة في وظيفة اجره فيها لا يتعدي الالفين جنيه ودي طبعا مشكلة كبيرة لان مبلغ زي دة في الظروف الاقتصادية اللي احنا فيها صعب عليه يفتح بيت حتي لو انا هقدر اساعدة برضه بنتكلم في مبلغ لايمكن بحسبة ورقة وقلم انها تغطي مصاريف بيت .. وعمالين ناخر الجواز للسبب دة وابوه مش مقتنع ان دة سبب حقيقي للتاخير وياسنا اننا نقنعه .. المهم .. انا دلوقتي في حيرة لان السنين بتمر من عمرنا واحنا احلامنا كبيرة وكتيرة وكلها في صالح المستقبل اللي المفروض يبقي كويس واهلي كمان ابتدوا يضايقوا وفعلا امي حاولت مرة تقنعني بفسخ الخطبة لان انا كان اتقدملي ناس تانية مستواهم المادي كان افضل بكتير لكن انا مقتنعة ان الحب او الزواج اللي يبقي فيه حب قادر انه يصنع المعجزات ولا حضرتك مش معايا في نفس الراي ؟ .. دلوقتي انا محتاجة لحل علشان نتخطي المرحلة الغلسة دي ومش خاطر علي بالي اي حلول هل ممكن تساعديني من فضلك ؟
هبة
فضفضة
محررة الصفحة .. نيفين حجازي
شوفي يا هبة كلامك جميل وتمسكك بخطيبك جميل لكن بما انك عندك استعداد تساعديه انا شايفة ان مفيش اي مشكلة انك تساعديه اما يبحث عن وظيفة بجانب وظيفته او انتي تعملي مشروع صغير مش شرط راس ماله يبقي كبير لكن هيبقي بداية لحاجة كويسة تساهم في حل المشكلة ودورك انك تقفي في ضهرة لتفتيح له افكار مختلفة لشغل اخر يساعدكم في بدايتكم الموفقة باذن الله الحياة كدة وانتوا اكيد صغيرين يعني هوة دة الوقت اللي تقدروا تتعبوا فيه علشان بكرة .. حاولي معلش في الاتجاه دة واكيد باذن الله هتلاقي وظيفة او فكرة تساعدي بيها خطيبك .. اصل دلوقتي مفيش وقت لانتظار الصدفة او الحظ كل الحكاية شوية مجهود منكم للبحث عن داءل مهنية باجر اعلي وتساعديه بالفكرة اللي قلتلك عليها والله الموفق باذن الله