هيثم فهر التاجي يكتب: من المسئول عن استبدال الصندوق المصري بالصندوق الدولي علي مدار سبع سنوات؟!

ركن القراء

هيثم فهر التاجي
هيثم فهر التاجي


أنا هكتب مقالي المرة دي باللغة العامية عشان مضمونه يوصل لاكبر عدد ممكن بالاضافة إن كلامي هيبقي بكل حياد عن موضوع قرض صندوق النقد وإرجعوا معايا بالذاكرة شوية :-

١- #المجلس_العسكري٢٠١١ بعد يناير بقيادة طنطاوي طلب قرض أيامها بقيمة ٤ مليار دولار وكان مجلس الشعب بأغلبية الإخوان رفضوا القرض بحجة إنه فوائد ربوبية وطلع رئيس اللجنة الدينية بتاعهم السيد عسكر بالمجلس وقال حرام وعليه إترفض .
٢- #في_عهد_الإخوان٢٠١٢ سعوا للحصول علي نفس القرض من صندوق النقد الدولي بقيمة ٤ مليار دولار ولما الناس هاجت وقالت إنتوا مش قولتوا إنه حرام وفوائد ربيوية طلع مرسي بنفسه بإحتفالية ٦ أكتوبر. ٢٠١٢ اللي كانت بإستاد القاهرة وقال إنها مش حرام ودي مصاريف إدارية مش فوائد ربيوية وفضلوا يتواصلوا وقتها لغاية يوم ١٩ يونيو ٢٠١٣ وطلع مرسي بحوار صحفي إتعمل معاه وقال مازلنا في التواصل ومستنيين الرد .
٣- #في_عهد_السيسي تواصل السيسي برضو مع صندوق النقد ٢٠١٦ بقيمة ١٢ مليار دولار واتوافق بعد المفاوضات ومن هنا جيه التحكم في السياسة الإقتصادية المصرية برفع الدعم وكل اللي إحنا شايفينه دا .
طيب ودا نتيجة إيه ؟! 
إن #المجلس_العسكري #والإخوان #والسيسي كلهم سعوا للقرض وتواصلوا مع الصندوق مع العلم إن الأنظمة التلاتة دي كانت عارفة باللي هيحصل نتيجة الحصول علي القرض من رفع الدعم وغلاء المعيشة بس الفرق هنا باللي هييجي في وشه من الأنظمة الثلاثة الموافقة علي القرض في عهده ويقوم بتنفيذ سياسات الموت بتاعت الصندوق - طيب وكل دا ليه ؟! طبعاً دا نتيجة إن مبارك كان سايب ٣٦ مليار دولار إحتياطي بالإضافة ل ٩ مليار وديعة حرب الخليج يعني كدا إجمالي ٤٥ مليار دولار سابهم مبارك إتصرفوا في سنة بسبب خراب يناير
ركزوا شوية معايا هنا بعد يناير وترك مبارك الحكم - تولي عصام شرف رئاسة الحكومة من ١٥ مارس ٢٠١١ وقام بفترة توليه بسحب ما يقرب من ٩ مليار دولار من الإحتياطي بتاعنا وكان دا في تسع شهور بس عشان يغطي المطالب الفئوية بتاعت ميدان التحرير الغير مدروسة - بالإضافة إن أغلق فيها ما يقرب من خمسة آلاف مصنع في سنة يناير بس نتيجة تردي الاوضاع بالإضافة لدخل السياحة كان ١٤ مليار دولار نزلوا النص بعدها فوق دا كله وكله ارتفعت موازنة الاجور والمرتبات السنوية من ٨٧ سنويا إلي ٢٥٦ مليار دون دراسة ودا كان ناتج عن المظاهرات بالزيادات الفئوية بعد يناير بإجراءات غير مدروسة .
فكل دا أدي لوقوع إقتصاد مصر بالتتابع بوصول الاحتياطي ل ١٦ مليار دولار بس وعشاان كدا كل اللي جيه اللي الحكم بعد مبارك طلبوا القرض رغم تمويته للمواطن البسيط من تطبيق إجراءاته .

طيب واخرة اللي احنا فيه دا ايه ؟! من وجهة نظري السيسي بيحكم او اي حد لازم هيكمل في القرض دا عشان مصر متعلنش افلاسها . طيب المطلوب التعامل مع الواقع المر دا إزاي ؟!
١- تغير حكومة عجز الفكر دي .
٢- سرعة تدارك خطأ تحويل السياسة الإقتصادية بالشكل السريع دا من الإقتصاد الإشتراكي للإقتصاد الرأسمالي الحر دون أدني درجات الحماية للمواطن البسيط .
٣- لازم حكومة يكون لديها فكر خارج الصندوق تيجي وتعمل علي إعادة توزيع الضرايب وسياسة رفع الدعم بطريقة تصاعدية علي الدخل والأجور وحسابات البنوك والممتلكات الخاصة لحماية محدودي الدخل والطبقة المتوسطة من التآكل .
٤- اللي قرا ملخص ما حدث دا علي مدار سبع سنين من دمار يناير وسعي كل الأنظمة للحصول علي الدواء المر القاتل دا كان بسبب إنهيار الإقتصاد المصري بعد أول كام شهر بس من حدوثها وعليه مصر كلها دفعت تمن إنتفاضة مستوردة من الخارج ومعدة مسبقاً لخطوات إنهيار مصر بشكل تدريجي ممنهج زي ما إحنا شايفين كدا رغم صدق نوايا بعض الشباب البسيط اللي شاركوا فيها ولكن كانوا لا يعلموا إن بيتم إستخدامهم لتنفيذ أجندات خارجية عن طريقهم دون أن يدروا بسطائهم ولكن كانوا يدروا قادتهم بالمخطط الشيطاني دا اللي كان هدفه النهائي تقسيم مصر عن طريق الإنقسامات الداخلية والحروب الأهلية طبقاً لتنفيذ مخطط الشرق الأوسط الكبير .. رغم إني هنا لم أتطرق لمخططات الإرهاب من الداخل والخارج لإنهيار وتدمير المجتمع والجيش المصري العظيم ولكن إكتفيت مؤقتاً بسرد المخطط التدميري الإقتصادري لنا الذي ظهرت بوارده من أول يوم .

وعليه لابد من محاكمة يناير ورجوع الأوضاع لسابق عهدها ثم تدارك الأخطاء التي كانت موجودة قبلها بشكل ممنهج ومدروس من قبل مؤسسات الدولة وليست بعشوائية مطالبة الميدان التي أدت لما نحن عليه الآن .